აჭარის მთავრობა ბათუმში, გმირთა ხეივანში ტურისტული ინფრასტრუქტურის განვითარებისთვის ინვესტორს ეძებს.

აჭარის ფინანსთა და ეკონომიკის სამინისტრო 15 ივლისს ჩანიშნულ პირობებიან აუქციონზე, ტ. აბუსერიძის ქ. N15/ფიროსმანის ქ. N5-/აბუსერიძის ქუჩა 17-ში მდებარე 4169 კვ.მ არასასოფლო- სამეურნეო დანიშნულების მიწის ნაკვეთზე სასტუმროს აშენების მსურველს ინვესტორს გამოავლენს. ობიექტის საწყისი ღირებულება 1 მლნ 560 ათასი ლარია.

აუქციონში გამარჯვებული ინვესტორი ვალდებულია აღნიშნულ ტერიტორიაზე მინიმუმ 60 ნომერზე გათვლილი სასტუმრო ააშენოს. მყიდველის სურვილის შემთხვევაში შენობის ნაწილში დასაშვებია საცხოვრებელი აპარტამენტების განთავსება. ინვესტორი ვალდებულება ხდება ასევე მიწისქვეშა ავტოსადგომისა და  სტილობატის (ე.წ "პოდიუმი") მოწყობა, რომელიც საზოგადოებრივი და კომერციული დანიშნულებით იქნება გამ,ოყენებული.

მრავალფუნქციური შენობა-ნაგებობის დასრულება და ექსპლუატაციაში მიღება შესაბამისი ხელშეკრულების გაფორმებიდან 54 თვის ვადაში უნდა განხორციელდეს.
აღსანიშნავია, რომ შენობის ფასადის შეფუთვა უნდა განხორციელდეს ე.წ განიავებადი ტექნოლოგიით, თანამედროვე სამშენებლო მასალების გამოყენებით;

შენობაში, არანაკლებ 2000 კვ.მ ფართზე თანამედროვე სტანდარტების შესაბამისი „ჰიპერმაკეტი“ უნდა განთავსდეს. აღნიშნული პროექტისათვის ინვესტორმა მინიმუმ 11 მლნ  674 ათასი დოლარის ინვესტიცია უნდა განახორციელოს.

შეგახსენებთ, რომ გმირთა ხეივნის განვითარების კონცეფციაზე აჭარის ფინანსთა და ეკონომიკის სამინისტრომ იმუშავა. ტერიტორიის ფართობია 3 ჰა. დაგეგმარების მიხედვით ხეივანი 14 საინვესტიციო მიწის ნაკვეთად დაიყო, რომლის ათვისება 3 ეტაპად განხორციელდება.

კონცეფციის მიხედვით შენობის მაქსიმალური სიმაღლე 140, ხოლო მინიმალური 30 მეტრი განისაზღვრა. ტერიტორიაზე სასტუმროების, აპარტამენტების, რესტორნების, სხვადასხვა გასართობი ობიექტებისა და სპორტული ცენტრების განთავსება იქნება შესაძლებელი. გმირთა ხეივნის განვითარების კონცეფციის მიზანი საინვესტიციო გარემოს გაუმჯობესება, ბიზნესის/ტურიზმის ხელშეწყობა,სამუშაო ადგილების შექმნა და ქალაქის ინფრასტრუქტურის განვითარებაა.

იმავდროულად, გმირთა ხეივანში 3 ახალი ინვესტიციის განხორციელება უკვე დაიწყო.

-