სამცხე-ჯავახეთში დაავადება „თურქულის" საწინააღმდეგო საერთაშორისო სწავლებები მიმდინარეობს

სამცხე-ჯავახეთის რეგიონში დაავადება „თურქულის" საწინააღმდეგო საერთაშორისო სიმულაციური სავარჯიშოები მიმდინარეობს. საქართველოს სოფლის მეურნეობის სამინისტროს სურსათის ეროვნულის სააგენტოს ვეტერინარიის დეპარტამენტის წარმომადგენლებთან ერთად სწავლებებში სომხეთის, აზერბაიჯანის, ირანის, რუსეთის სპეციალისტები, საერთაშორისო ექსპერტები და ტრენერები მონაწილეობენ.

სურსათის ეროვნული სააგენტოს უფროსის მოადგილის, ქვეყნის მთავარი ვეტერინარის მიხეილ სოხაძის განცხადებით, სიმულაციური სავარჯიშო მიზნად ისახავს მონაწილე ქვეყნების შესაძლებლობების შეფასებას და  გაძლიერებას „თურქულის" ეპიდემიოლოგიური აფეთქების შემთხვევაში, რაც დაავადების კონტროლსა და პრევენციას შეუწყობს ხელს.

სურსათის ეროვნული სააგენტოს მიერ „თურქულის" საწინააღმდეგოდ განხორციელებული ვეტერინარული ღონისძიებების შედეგად, საქართველოში ეპიზოოტიურად სტაბილური მდგომარეობაა. სახელმწიფო პროგრამის ფარგლებში, ვაქცინაცია  წელიწადში ორჯერ ტარდება. მიმდინარე წლის ექვსი თვის მონაცემებით, თურქულის საწინააღმდეგოდ ვაქცინირებულია მილიონ  200 ათასამდე  სული წვრილფეხა და მსხვილფეხა  პირუტყვი.

თურქული (Foot and Mouth Disease) ვირუსული ინფექციური დაავადებაა, რომელიც  სწრაფად ვრცელდება და დიდ ეკონომიკურ ზარალს იწვევს. ქვეყანაში დაავადების დაფიქსირების შემთხვევაში, ფერხდება ცოცხალი ცხოველებისა და მეცხოველეობის, ზოგჯერ მცენარეული პროდუქციის ექსპორტიც.

საქართველოში საერთაშორისო სიმულაციური სავარჯიშოების  ჩატარების შესახებ გადაწყვეტილება მიმდინარე წლის მაისში, პარიზში ცხოველთა ჯანდაცვის მსოფლიო ორგანიზაციის (OIE) 84 -ე გენერალურ სესიაზე მიიღეს. სწავლებები  გაეროს სურსათისა და სოფლის მეურნეობის ორგანიზაციის  (FAO) და ევროკავშირის მხარდაჭერით იმართება.