საგარეო საქმეთა მინისტრი ავსტრიის რესპუბლიკის ეროვნული საბჭოს მეორე პრეზიდენტს შეხვდა

 2016 წლის 14 ივლისს, ბათუმში გაიმართა საქართველოს საგარეო საქმეთა მინისტრის მიხეილ ჯანელიძისა და ავსტრიის რესპუბლიკის ეროვნული საბჭოს (პარლამენტი) მეორე პრეზიდენტის კარლჰაინც კოპფის (Karlheinz Kopf) შეხვედრა.

შეხვედრაზე მაღალი შეფასება მიეცა საქართველოსა და ავსტრიის ურთიერთობებში არსებულ პოზიტიურ დინამიკას და ყურადღება დაეთმო ორმხრივ და მრავალმხრივ ფორმატებში თანამშრომლობის საკითხებს. ხაზი გაესვა 2016 წლის აგვისტოში თბილისში ავსტრიის რესპუბლიკის საელჩოს გახსნის მნიშვნელობას, რაც კიდევ უფრო განამტკიცებს ურთიერთობებს.

მიხეილ ჯანელიძემ მადლობა გადაუხადა ავსტრიის ეროვნული საბჭოს მეორე პრეზიდენტს ავსტრიული მხარის მიერ საქართველოს ევროპული მისწრაფებებისა და ტერიტორიული მთლიანობის ურყევი მხარდაჭერისათვის.

ხაზი გაესვა, რომ საქართველო-ევროკავშირს შორის ასოცირების შეთანხმების ძალაში შესვლა, ღრმა და ყოვლისმომცველი თავისუფალი სავაჭრო სივრცის (DCFTA) ჩათვლით, ახალ იმპულსებს შესძენს ორმხრივი თანამშრომლობის გაღრმავებას, განსაკუთრებით ეკონომიკური კავშირების შემდგომი გააქტიურების კუთხით. ამასთან, გამოითქვა იმედი, რომ ორ ქვეყანას შორის არსებული წარმატებული თანამშრომლობა ენერგეტიკის, გარემოს დაცვის, განვითარების, სამართალდაცვით, კულტურისა და განათლების სფეროებში კიდევ უფრო განმტკიცდება.

შეხვედრაზე საუბარი ასევე შეეხო ოკუპირებულ ტერიტორიებზე შექმნილ ვითარებას და საქართველოს მთავრობის ძალისხმევას კონფლიქტის მშვიდობიანი მოგვარების მიზნით, რეგიონში არსებულ მდგომარეობას და მეზობელ ქვეყნებთან ურთიერთობებს. მხარეებმა განიხილეს 2017 წელს ავსტრიის ეუთო-ს თავმჯდომარეობის პრიორიტეტები და ავსტრიული მხარის სამომავლო როლი რეგიონული გამოწვევების დაძლევის მიმართულებით.

 ბათუმის კონფერენციის ფარგლებში, ავსტრიის რესპუბლიკის ეროვნული საბჭოს მეორე პრეზიდენტმა შეხვედრები ასევე გამართა საქართველოს პრემიერ-მინისტრთან გიორგი კვირიკაშვილთან, პარლამენტის თავმჯდომარესთან დავით უსუფაშვილთან, პირველ ვიცე-პრემიერთან, ეკონომიკისა და მდგრადი განვითარების მინისტრთან დიმიტრი ქუმსიშვილთან და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრთან დავით ბაქრაძესთან. 15 ივლისს დაგეგმილია კარლჰაინც კოპფის სტუმრობა საქართველოში წარმოდგენილ ავსტრიულ კომპანიებთან.

კარლჰაინც კოპფი ბათუმის მე-13 საერთაშორისო კონფერენციაში „საქართველოს ევროპული გზა“ მონაწილეობის მიღების მიზნით, 14-15 ივლისს საქართველოში ვიზიტით იმყოფება.

 აღსანიშნავია, რომ 2014 წლის შემდეგ, ეს ავსტრიელი მაღალჩინოსნის უკვე რიგით მესამე ვიზიტია ჩვენს ქვეყანაში.