ნიუ-იორკის მოდის კვირეულზე ქართულმა მაღაზიამ კაფსულური კოლექცია წარმოადგინა

ნიუ-იორკის მოდის კვირეულის ფარგლებში, საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტოს მხარდაჭერით 8 სექტემბერს ნიუ-იორკის ცნობილი სასტუმროს Dream Downtown NYC ტერასაზე ქართული კონცეპტუალური მაღაზიის მალატის კაფსულური კოლექციის (MALAT CAPSULE COLLECTION BY GEORGIAN FASHION DESINGERS)  ჩვენება გაიმართა. მაღაზია მალატისთვის კაფსულური კოლექციები ექსკლუზიურად შექმნეს ისეთმა ქართველმა დიზაინერებმა როგორებიც არიან: დალოოდი, ლალო დოლიძე, აკა ნანიტაშვილი, ნინო ბაბუხადია, ელოში, სალომე ღვინიაშვილი, ვასკა ტაბატაძე, UGLY, ნათია ხუციშვილი და NATIA CUFF. ჩვენებამ, რომელსაც ცნობილი უცხოელი დიზაინერები, სტილისტები და მედიის წარმომადგენლები ესწრებოდნენ,  დიდი გამოხმაურება გამოიწვია და ქართველი დიზაინერების ნამუშევრებიც წარმატებულად გაიყიდა.

აღსანიშნავია, რომ უკვე რამდენიმე სეზონია რაც მეწარმეობის განვითარების სააგენტო აქტიურად უწყობს ხელს ქართველი დიზაინერების ნამუშევრებისა თუ კომპანიების ნაწარმის საზღვრებს გარეთ გატანას და მსოფლიო ბრენდებსა და ქართველ დიზაინერებს შორის კავშირების დამყარებას. კონცეპტუალური მაღაზია მალატის მხარდაჭერაც სწორედ რომ ხელს უწყობს ქართველი დიზაინერების ნამუშევრების პოპულარიზაციას მსოფლიო მასშტაბით და ქართული საფეიქრო ინდუსტრიის განვითარებას ემსახურება.