საქართველოს მეხუთე პრეზიდენტს სავარაუდოდ, პარლამენტი აირჩევს

საქართველოს მეხუთე პრეზიდენტს სავარაუდოდ, პარლამენტი აირჩევს. აღნიშნულ საკითხზე ,,ქართული ოცნების“ ლიდერები ჯერ კიდევ 8 ოქტომბრის არჩევნებამდე საუბრობდნენ. პრეზიდენტის პარლამენტის მიერ არჩევის შესახებ საკითხი მას შემდეგ გააქტიურდა, რაც ,,ქართული ოცნება - დემოკრატიული საქართველოს“ მიერ პარლამენტში საკონსტიტუციო უმრავლესობით მოსვლის დიდი ალბათობა გამოიკვეთა.

აღნიშნულ საკითხზე ისაუბრა ირაკლი კობახიძემაც დღეს, ,,ტვ პირველის“ ეთერში და განაცხადა, რომ ახალი მოწვევის პარლამენტში პრეზიდენტის დანიშვნის საკითხი შესაძლოა დადგეს და ის იქნება ფართოდ განხილული. მისი თქმით, პრეზიდენტის არჩევასთან დაკავშირებით, საკონსტიტუციო ცვლილება მხოლოდ კონსენსუსის გზით იქნება მიღწეული.

აღსანიშნავია, რომ ექს-პრემიერმა ბიძინა ივანიშვილმა წინასაარჩევნო პერიოდში განაცხადა, რომ პრეზიდენტად ირაკლი ღარიბაშვილის კანდიდატურა იქნებოდა მისაღები. მისივე თქმით, ღარიბაშვილს ქართულ პოლიტიკაში დაბრუნებისთვის დიდი რესურსი აქვს.