“რკ ალაზნის თავი” თუშეთის ეროვნული პარკის ტერიტორიაზე აგროტურიზმს განავითარებს

მთავრობამ თუშეთის ეროვნული პარკის ტერიტორიაზე 1000 კვ/მ ფართობი კოოპერატივ “რკ ალაზნის თავს“ აღნაგობის უფლებით  გადასცა. როგორც №2205 განკარგულებიდან ირკვევა, მთავრობამ აღნიშნული ქმედება აგროტურიზმის განვითარების მიზნით განახორციელა. საუბარია “რკ ალაზნის თავის” მიერ ცხვრის ყველის დამზადების ინფრასტრუქტურის მოწყობაზე, უფრო კონკრეტულად კი კოოპერატივმა აღნიშნულ ტერიტორიაზე ცხვრის საწველი ბაკი, ტრადიციული თუშური გუდის ყველის დამზადებისა და შენახვის საწყობი, საკარვე და საპიკნიკე ადგილი და საპირფარეშო/საშხაპე უნდა მოაწყოს.

კოოპერატივ “რკ ალაზნის თავს“ თუშეთის ეროვნული პარკის ტერიტორიაზე ფართობი 49 წლიანი აღნაგობის უფლებით გადაეცა. აღნაგობის ყოველწლიურ საზღაურად კი 400 ლარი განისაზღვრა.

კოოპერატივ “რკ ალაზნის თავსა“ და გარემოსა და ბუნებრივი რესურსების დაცვის სამინისტროს, დაცული ტერიტორიების სააგენტოს შორის, შესაბამისი მემორანდუმი უახლოპეს პერიოდში გაფორმდება.