გერმანიასა და შვედეთში პირველი ქართველი დიპლომატების მოღვაწეობის შესახებ საარქივო მასალა ეროვნულ არქივს გადაეცა

საქართველოს ეროვნულ არქივს გერმანიასა და შვედეთში პირველი ქართველი დიპლომატების მოღვაწეობის შესახებ საარქივო მასალა გადაეცა.

საგარეო საქმეთა მინისტრის მოადგილემ გიგი გიგიაძემ და საგანგებო დავალებათა ელჩმა კონსტანტინე ქავთარაძემ საქართველოს ეროვნულ არქივს ოფიციალურად გადასცეს 1918-1921 წლებში გერმანიასა და შვედეთის სამეფოში საქართველოს დემოკრატიული რესპუბლიკის პირველი დიპლომატიური წარმომადგენლობის ფუნქციონირების შესახებ არსებული საარქივო მასალა.

აღნიშნული უნიკალური საარქივო მასალის ნაწილი საქართველოს საგარეო საქმეთა სამინისტრომ ოფიციალურად გამოითხოვა გერმანიის საგარეო საქმეთა ფედერალური სამინისტროსა და შვედეთის სამეფოს საგარეო საქმეთა სამინისტროებში დაცული არქივებიდან.

საქართველოს ეროვნული არქივის გენერალურ დირექტორთან, თეონა იაშვილთან გამართული შეხვედრის დროს გიგი გიგიაძემ განცხადა, რომ საგარეო საქმეთა სამინისტრო მომავალშიც გააგრძელებს მჭიდრო თანამშრომლობას საქართველოს ეროვნულ არქივთან და საზღვარგარეთ საქართველოს საელჩოების დახმარებით მაქსიმალურად შეეცდება 1918-1921 წლებში საზღვარგარეთ არსებული პირველი ქართული დიპლომატიური წარმომადგენლობებისა და ქართველი დიპლომატების შესახებ საარქივო მასალების მოძიებას, მათი საქართველოში დაბრუნებისა და ეროვნული არქივის შევსების მიზნით.

საგარეო საქმეთა მინისტრის მოადგილემ მადლობა  გადაუხადა საქართველოს ეროვნული არქივის დირექტორს საზღვარგარეთ პირველი ქართული დიპლომატიური წარმომადგენლობების შესახებ საარქივო ინფორმაციის შეგროვების პროცესში გაწეული განსაკუთრებული ძალისხმევისთის.