ისლამისტებმა ერაყში ქრისტიანული ეკლესია ”ხალიფატის შვილების” მომზადების ცენტრად გააქციეს

”ისლამური სახელმწიფოს” ტერორისტებმა ერაყის ქალაქ თელ-ქაიფის მთავარი ქრისტიანული ტაძარი ბავშვების მებრძოლებად აღზრდის ცენტრად გააქციეს. თელ-ქაიფის მოსახლოება ძირითადად ქრისტიანი ასირიელებისგან შედგება.

თვითმხილველთა თქმით, ტერორისტებმა ქალაქში ეკლესიების უმეტესობა დაანგრიეს. ქალაქის მთავარ ეკლესიას მებრძოლებმა ”აბუ თალჰა ალ ანსარი” უწოდეს და გადააქციეს ბაზად, სადაც ე.წ. ”ხალიფატის შვილებს” ამზადებდნენ. ქურთული ტელეარხის Rudaw-ის  ინფორმაციით, სწავლება 25-20 დღეს გრძელდებოდა, რის შემდეგაც ბავშვებს პირდაპირ ბრძოლის ველზე აგზავნიდნენ.

როგორც ერთ-ერთმა თვითმხილველმა ტელეკომპანიას განუცხადა, ისლამისტებმა  იცოდნენ, რომ თვითმფრინავები ეკლესიებს არ ბომბავდნენ. ”ისლამურმა სახელმწიფომ” ეკლესია თავის შტაბად გადააქცია, მათ საიდუმლოდ მოჰყავდათ ბავშვები მოსულიდან”, - აღნიშნა თვითმხილველმა.

მედიის მონაცემებით, ბავშვების ასაკი საშუალოდ 15 წელს შეადგენდა. მოზარდები თავდაპირველად მეჩეთში ხალიფატისთვის ერთგულების ფიცის დასადებად მიჰყავდათ. შემდეგ კი ეკლესიაში განთავსებული ბაზაში გადაჰყავდათ, სადაც ბრძოლის ველზე გაგზავნამდე წვრთნიდნენ და არწმუნებდნენ, რომ სამოთხეში მოხვდებოდნენ.

მოსულის გათავისუფლების ოპერაცია 17 ოქტომბერს დაიწყო. მასში მონაწილეობს ერაყის არმია, ქურთების ”პეშმერგას” რაზმები და საერთაშორისო სამხედრო კოალიცია აშშ-ის მეთაურობით. ქალაქი თელ-ქაიფი, რომელიც მოსულთან ახლოს მდებარეობს, ტერორისტებისგან უკვე გათავისუფლებულია.