მუსულმანმა მოძღვარმა სიკვდილის შემდეგ 130 ცოლი და 203 შვილი დატოვა

ნიგერიაში მუსულმანი სულიერი მოძღვარი მუჰამედ ბელო აბუბაქარი 93 წლის ასაკში გარდაიცვალა და სხვადასხვა მონაცემებით 86-დან 130-მდე  ცოლი დატოვა. ამის შესახებ  BBC News-ი წერს.

BBC News -ი იუწყება, რომ 2008 წელს ბელოს 86 ცოლი ჰყავდა, ნიგერიული გაზეთი  Daily Trust-ი კი წერს, რომ მათი რაოდენობა 130-მდე გაიზარდა.

Daily Trust-მა მისი შვილების რაოდენობაც დათვალა, მოძღვარს 203 შვილი დარჩა, თუმცა მათი რიცხვი მალე გაიზრდება, რადგან ბელოს ზოგიერთი ცოლი ისევ ორსულადაა.

BBC News-ი ბელოს ცოლებს გაესაუბრა. ერთ-ერთმა მათგანმა ჟურნალისტებს განუცხადა, რომ სკოლაში  სწავლისას დედამ ის მოძღვართან წაიყვანა. მან კი გოგონას ცოლობა სთხოვა. იმის მიუხედავად, რომ გოგონა უარს ამბობდა, ბელომ მაინც დაითანხმა და უთხრა, რომ ეს უფლის ბრძანება იყო.

2008 წელს მუჰამედ ბელო აბუბაქარი შარიათის კანონების დარღვევისთვის დააპატიმრეს. კანონის მიხედვით მუსულმანებს ოთხ ცოლზე მეტის შერთვა ეკრძალებათ. თუმცა მოგვიანებით მას ბრალდება მოუხსნეს და გაათავისუფლეს.