მიშელ ობამას ბოსტანს მელანია ტრამპიც მოუვლის

აშშ-ის პირველი ლედი შეინარჩუნებს თეთრი სახლის ბოსტანს, რომელსაც მისი წინამორბედი მიშელ ობამა უვლიდა. მელანია ტრამპის მრჩევლის სტეფანი უოლკოფის თქმით, პარკის ყველა კუთხეს, მათ შორის ვარდების ბაღსა და პატარა ბოსტანს ძველებურად გაუფრთხილდებიან.

2009 წელს მიშელ ობამამ ამერიკელ მოსწავლეებთან ერთად თეთრი სახლის სამხრეთით ბოსტნის კვლები გააშენა. მანამდე არსებული ბოსტნის აღდგენის თხოვნით მას საერთაშორისო ორგანიზცია Kitchen Gardeners International-მა მიმართა, რომელიც ეკოლოგიურად სუფთა საკვებს უწევს პროპაგანდას.

რვა წლის განმავლობაში მიშელმა ბოსტანზე ზრუნვა თავის თავზე აიღო. მოყავდა ბოსტნეული - მწვანილი, ბატატი, სალათის ფურცლები, ბროკოლი, ისპანახი, პიტნა, ჭარხალი, ხახვი, კამა, რევანდი, ბარდა და გოგრა. კვლების გასწვრივ ხარობდა ყვავილები. როგორც ამბობენ, თეთრი სახლის მუდმივ მობინადრეებსა და სტუმრებს სწორედ მიშელის ბოსტანში მოყვანილი პროდუქტით უმასპინძლდებოდნენ.

ბოსტანი იმ კამპანიის მთავარი ელემენტი გახდა, რომელიც მიშელ ობამამ ჯანსაღი კვების მხარდასაჭერად წამოიწყო. პირველი ლედი ბოსტანში ატარებდა ექსკურსიებს სკოლის მოსწავლეებისთვის, ბავშვები კი მას შემოდგომობით მდიდარი მოსავლის აღებაში ეხმარებოდნენ.