აშშ-მა ეროვნული უსაფრთხოების მთავარ საფრთხეებად რუსეთი, ჩინეთი, ჩრდილოეთ კორეა და ირანი დაასახელა

თეთრმა სახლმა გამოაქვეყნა აშშ-ის ეროვნული უსაფრთხოების ახალი სტრატეგია. დოკუმენტში ძირითადი ყურადღება რუსეთს, ჩინეთს, ჩრდილოეთ კორეას, ირანსა და ახლო აღმოსავლეთს ეთმობა.

რუსეთი და ჩინეთი დოკუმენტში რევიზიონისტურ სახელმწიფოებად არიან მოხსენიებულნი, რომლებიც სტატუს-ქვოს შეცვლისკენ ისწრაფვიან.

აშშ ამტკიცებს, რომ მოსკოვის ქმედება მის მეზობელ სახელმწიფოებს საფრთხეს უქმნის.

“რუსეთი იყენებს პროვოკაციულ საშუალებებს ევროპაში აშშ-ის პოლიტიკის შესუსტებისთვის, ევრო-ატლანტიკური ერთობის განხეთქილებისთვის, ასევე ევროპული სტრუქტურებისა და მთავრობების შესუსტებისთვის“, - ნათქვამია დოკუმენტში.

ამიტომ აშშ აპირებს გააძლიეროს თავდაცვა ნატოს აღმოსავლეთ ფლანგზე და დაეხმაროს მოკავშირეებს ეფექტურ თავდაცვაში. ამ ორი სახელმწიფოდან მომდინარე საფრთხის გათვალისწინებით, აშშ აპირებს გააფართოოს მრავალდონიანი რაკეტსაწინააღმდეგო თავდაცვის სისტემა და აღნიშნავს, რომ ის რუსეთისა და ჩინეთის წინააღმდეგ არ იქნება მიმართული.

დოკუმენტში აღნიშნულია, რომ ჩრდილოეთ კორეა და ირანი რეგიონის დესტაბილიზაციას ახდენენ, ემუქრებიან აშშ-სა და მის პარტნიორებს და სასტიკად ექცევიან საკუთარ ხალხს.

დოკუმენტში ნათქვამია, რომ ირანი მხარს უჭერს ტერორიტსულ ორგანიზაციებს და მათ ღიად მოუწოდებს აშშ-ის განადგურებისკენ.

ამის გარდა დოკუმენტის ავტორები აღნიშნავენ, რომ ირანმა შესაძლოა მუშაობა განაახლოს ბირთვულ იარაღზეც.