რატომ არ იმღერებს ნატო გელაშვილი 31 დეკემბერს და როგორია მისი წინასაახალწლო ტრადიცია

საქართველო, თბილისი - 14:48 | 29.12.2017

ნანახია: 43870

„პრაიმნიუსჯორჯიას“ წინასაახალწლო ტრადიციებზე ნატო გელაშვილი ესაუბრება.

ნატო, ახალ წელს სად ხვდებით?

წინასწარ არასდროს არ ვიცი სად შევხვდები ახალ წელს. მინდოდა რომ სახლში ვყოფილიყავი. ბიჭებიდან გამომდინარე მინდა, რომ ორიგინალურად გავატარო ახალი წელი. საერთოდ, ჩვენს ოჯახში ყველაფერი ხდება საათებით ადრე.

31 დეკემბერს სად იმღერებთ?

ბათუმში იყო დაგეგმილი ჩემი კონცერტები. ამის გარდა, მქონდა სხვა შემოთავაზებებიც, თუმცა ყველაფერზე უარი ვთქვი. წელს, მინდა რომ სახლში ვიყო და ახალ წელს ოჯახის წევრებთან ერთად შევხვდე.

გიყვართ ახალი წელი?

სიმართლე გითხრათ, შობა უფრო მიყვარს და აღდგომის დღესასწაული. ახალი წელი უყვართ ბიჭებს.

წინასაახალწლო ტრადიციებზე რას გვეტყვით?

აბსოლუტურად ყველა ტრადიციას ვიცავ, რაც ქართულ ოჯახს გააჩნია. აუცილებლად ვაკეთებ გოზინაყს. სანამ 12 საათი გახდება, ერთი საათით ადრე ვამთავრებ გოზინაყის გაკეთებას და მაშინ ვჭრი. ეს არის ჩვენი ოჯახური რიტუალი.

გოზინაყის რეცეპტი აუცილებლად უნდა გაგვიმხილოთ...

ეს არის ბებიას გადმოცემული რეცეპტი და ვაგრძელებ ტრადიციას. ვიღებ ნახევარლიტრიან ქილაში მოთავსებულ ღია ფერის თაფლს (უნდა აკლდეს ცოტა), ვადუღებ ქვაბში, თანაც, სამჯერ ვაგრილებ წამოდუღების შემდეგ. მესამე წამოდუღებაზე ნიგოზს ვყრი, რომელსაც არ ვხალავ, მხოლოდ ვარჩევ. სანამ ნიგოზს ჩავყრი, მანამდე ნახევარ ჭიქა შაქარს ვყრი, კარგად ვურევ, გალღობამდე რომ მიდის, მერე უკვე ნიგვზის ჯერია. ამის შემდეგ გამუდმებით ვურევ. ქვაბშივე რომ ფერს იცვლის, გემო რომ აქვს შესაბამისი და ოქროსფერს იღებს, ცხელსვე ვიღებ, სველი ხელით ვაბრტყელებ და ვჭრი აუცილებლად ცხელს, გაცივების შემდეგ ვეღარ აიღებ. მერწმუნეთ, ძალიან გემრიელია. ვისაც ჩემი გოზინაყი გაუსინჯავს, მეუბნებიან, საღოლ შენო... გოზინაყი ცოტა პრეტენზიული გასაკეთებელია, ყველას არ გამოსდის. ბევრს ვასწავლე, ზოგს მიეწვა, ზოგს დაეხრაკა და ა.შ.

საახალწლო სუფრასაც თქვენ ამზადებთ?

რა თქმა უნდა. ჩემი ბიჭებიც მეხმარებიან. ჩვენს ოჯახში ძალა ერთობაში პრინციპია, ყველაფერს ერთად ვაკეთებთ.

რა გინდათ, რომ ამ წელმა მოგიტანოთ?

პირველ რიგში, სიმშვიდე ოჯახებში, ჯანმრთელობა, ყველას კარგად ყოფნა. რაც არ უნდა ბევრი ფული გქონდეს ადამიანს, მერწმუნეთ არაფერს ბედნიერება არ მოაქვს, თუ არ ხარ ჯანმრთელი. მინდა, რომ ნაკლები გაჭირვებული იყოს მომავალ წელს. ძალიან მტკივა გული, როცა ამდენ გაჭირვებულ ადამიანს ვხედავ ქუჩაში ან მესმის ვინმეს საწუხარი.

ია ბარბაქაძე, პრაიმნიუსჯორჯია