ქართული კომპანია „ზეარის“ მსოფლიოს ინოვაციური სასმელების კონკურსის ფინალისტი გახდა

საქართველოში დამზადებული პროდუქტის ნატიფმა და ინოვაციურმა შეფუთვამ საერთაშორისო აღიარება მოიპოვა გერმანიაში გამართულ ინოვაციური სასმელების კონკურსზე, როდესაც ჭაჭის მწარმოებელი კომპანია „ზეარისი“ სამ ფინალისტს შორის მოხვდა „საუკეთესო შეფუთვის“ ნომინაციაში.

აღსანიშნავია, რომ საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტოს ინიციატივით 5 ქართული კომპანია მსოფლიოს ინოვაციური სასმელების კონკურსზე (World Beverage Innovation Awards 2015 ) პირველად წარსდგა, შესაბამისად პირველივე ჯერზე ღირსეული კონკურენტების ფონზე მსგავსი წარმატება საკმაოდ მნიშვნელოვანი მიღწევაა და ხელს უწყობს ქართული პროდუქციის საზღვრებს მიღმა პოპულარიზაციას, ქართული წარმოებით უცხოელი ინვესტორებისა თუ საერთაშორისო მყიდველების დაინტერესებას.

ღონისძიების დასკვნითი ნაწილი და დაჯილდოების ცერემონიალი გერმანიაში, ქალაქ ნიუნრბერგში 11 ნოემბერს გაიმართა, სადაც ოფიციალური მოწვევით კომპანია „ზეარისის“ წარმომადგენლები გაემგზავრნენ და როგორც უკვე აღინიშნა „საუკეთესო შეფუთვის“ ნომინაციაში საპატიო სერთიფიკატით დაჯილდოვდნენ. კომპანიას ასევე მიენიჭა უფლება არსებულ შეფუთვაზე მიუთითოს კონკურში მიღწეული შედეგის თაობაზე.

ინოვაციური სასმელების კონკურსზე მსოფლიოს მასშტაბით წამყვან კომპანიებს ასევე გაუწიეს კონკურენცია საუკეთესო კორპორატიული სოციალური პასუხისმგებლობის ინიციატივის ნომინაციაში კომპანიამ "Bioproduct“, საუკეთესო გაზიანი სასმელის ნომინაციაში კომპანიამ „ხილიანი“, საუკეთესო წვენის ნომინაციაში კომპანიამ „კამპა“, ხოლო საუკეთესო შეფუთვის დიზაინის ნომინაციაში კომპანიებმა „ზეარის“ და „წყალი მარგებელი“