ღარიბაშვილი: საბოლოო გადაწყვეტილებამდე გასავლელია ეტაპები, რაც რამდენიმე თვეს მოიცავს

საქართველოს პრემიერ-მინისტრის ირაკლი ღარიბაშვილის განცხადებით, დღეს ჩვენი ქვეყნისთვის, მისი თითოეული მოქალაქისთვის ისტორიული  დღეა.  

პრემიერმა ირაკლი ღარიბაშვილმა „სავიზო რეჟიმის ლიბერალიზაციის სამოქმედო გეგმის“ შესრულებასთან დაკავშირებით ევროკომისიის დასკვნის გამოქვეყნება სპეციალურ მიმართვაში შეაფასა.

„დღეს ჩვენი ქვეყნისთვის, მისი თითოეული მოქალაქისთვის ისტორიული  დღეა.  ევროინტეგრაციის გზაზე საქართველომ გადადგა ნაბიჯი, რომელიც დიდწილად განსაზღვრავს ჩვენ  მომავალს ევროპულ სახელმწიფოთა ერთიან ოჯახში.

სულ ცოტა ხნის წინ ევროკომისიამ გამოაქვეყნა ანგარიში საქართველოს მიერ სავიზო რეჟიმის ლიბერალიზაციის სამოქმედო გეგმის შესრულებასთან დაკავშირებით, რომელსაც ყველა ასე მოუთმენლად ველოდით.

კომისიამ ცალსახად განაცხადა: საქართველოს ხელისუფლებამ წარმატებით შეასრულა ევროკავშირის წინაშე აღებული ვალდებულებები. სავიზო რეჟიმის ლიბერალიზაციისთვის საჭირო ყველა რეფორმა სრულყოფილად  განხორციელდა“,  - აღნიშნა პრემიერმა.

ღარიბაშვილის თქმით, საბოლოო გადაწყვეტილებამდე გარკვეული ეტაპებია გასავლელი.

„ეს არის პრინციპული თანხმობა უვიზო მიმოსვლაზე. წარმატებული რეფორმების შედეგად ჩვენ უკვე მივაღწიეთ ევროკავშირთან ასოცირების ხელშეკრულების ხელმოწერას. ამის შემდეგ, ერთმნიშვნელოვნად პოზიტიური შეფასება ვიზა ლიბერალიზაციის გზაზე თავისუფალი, ძლიერი და ერთიანი საქართველოს შენების ურყევ საფუძველს კიდევ უფრო განამტკიცებს.

კომისიის რეკომენდაციის საფუძველზე  მომდევნო წლიდან საქართველოს მოქალაქეებს უნდა მიეცეთ ევროკავშირში უვიზო მიმოსვლის შესაძლებლობა.

ცხადია, ეს არ ნიშნავს,  რომ მოქალაქეები ხვალვე აიღებენ ბილეთებს და ევროპაში უვიზოდ გაემგზავრებიან. საბოლოო გადაწყვეტილებამდე  გასავლელია ეტაპები, რაც სხვა ქვეყნების გამოცდილებით, რამდენიმე თვეს მოიცავს“, - განაცხადა პრემიერმა.

„სავიზო რეჟიმის ლიბერალიზაციის სამოქმედო გეგმის“ საქართველოს მიერ შესრულების შესახებ მიმდინარე ანგარიში ევროკომისიის ოფიციალურ ვებგვერდზე   გამოქვეყნდა. ანგარიშში ნათქვამია, რომ საქართველომ ვიზალიბერალიზაციის სამოქმედო გეგმით ნაკისრი ვალდებულებები შეასრულა.