სამართლიანი და თავისუფალი არჩევნები განსაზღვრავს ჩვენი ქვეყნის ნატო-სთან თანამშრომლობის პერსპექტივას - სამადაშვილი

31 ოქტომბერს დემოკრატიული და სამართლიანი არჩევნები სხვა ბევრ რამესთან ერთად განსაზღვრავს ჩვენი ქვეყნის ნატო-სთან თანამშრომლობის პერსპექტივას, ნატო-ს გენერალური მდივნის მიერ გაკეთებულ განცხადებაში, მგონი, ეს გზავნილი ნათლად ამოვიკითხეთ, – ამის შესახებ „ნაციონალური მოძრაობის“ წევრმა სალომე სამადაშვილმა განაცხადა.

„ჩვენ ვიცით, რომ პირველ რიგში ნატო-ში გაწევრიანება ეფუძნება ჩვენი ქვეყნის მხრიდან იმ ღირებულებების გაზიარებას, რომლის გარშემოც არის გაერთიანებული ეს ალიანსი, რომელიც არის სამხედრო პოლიტიკური ალიანსი და ეფუძნება საერთო პოლიტიკურ ღირებულებებს, როგორიც არის დამოკრატია, კანონის უზენაესობა და სხვა. როცა ერთი მხრივ, ნატო-ს გენერალური მდივანი უცხადებს მხარდაჭერას ჩვენს ქვეყანას და იმედს გამოთქვამს, რომ გაგრძელდეს მჭიდრო პარტნიორული ურთიერთობები ნატო-სა და საქართველოს შორის და მეორე მხრივ, საუბრობს ისეთ პრობლემებზე, როგორიც არის მართლმსაჯულების დამოუკიდებლობა და გვაფრთხილებს, რომ მოახლოებული არჩევნები იქნება უკიდურესად მნიშვნელოვანი ტესტი ჩვენი ქვეყნისთვის, ვფიქრობ, რომ გზავნილი არის ძალიან ნათელი. 31 ოქტომბერს დემოკრატიული, სამართლიანი და თავისუფალი არჩევნები განსაზღვრავს სხვა ბევრ რამესთან ერთად ჩვენი ქვეყნის ნატო-სთან თანამშრომლობის პერსპექტივას. დღეს, ნატო-ს გენერალური მდივნის მიერ გაკეთებულ განცხადებაში მგონი, ეს გზავნილი ძალიან ნათლად ამოვიკითხეთ“, – განაცხადა სამადაშვილმა.