ბაქოში გამარჯვების აღლუმი მიმდინარეობს

აზერბაიჯანის დედაქალაქ ბაქოში ფართომასშტაბიანი სამხედრო აღლუმი იმართება მთიანი ყარაბაღის კონფლიქტში გამარჯვების აღსანიშნავად.

აღლუმს, რომელიც ბაქოს მთავარ მოედანზე მიმდინარეობს, აზერბაიჯანის პრეზიდენტი ილჰამ ალიევი და თურქეთის პრეზიდენტი რეჯებ ტაიპ ერდოღანი ესწრებიან, რომელიც 9 დეკემბერს ორდღიანი ვიზიტით აზერბაიჯანს ეწვია.

სამხედრო აღლუმში მონაწილეობას მიიღებს 3000-ზე მეტი სამხედრო მოსამსახურე და 150-მდე ერთეული სამხედრო ტექნიკა.

სექტემბრის ბოლოს მთიან ყარაბაღში საომარი მოქმედებები განახლდა, ​​რამაც გრძელვადიანი კონფლიქტი გამოიწვია და მშვიდობიანი მოსახლეობის მსხვერპლი მოჰყვა.

10 ნოემბერს ნიკოლ ფაშინიანმა რუსეთის პრეზიდენტ ვლადიმირ პუტინთან და აზერბაიჯანის პრეზიდენტ ილჰამ ალიევთან ერთად ხელი მოაწერა ყარაბაღში ომის დასრულების შესახებ შეთანხმებას.

დოკუმენტის პირველი სამი პუნქტის თანახმად:

1. 10 ნოემბერს, მოსკოვის დროით 00:00 საათიდან მთიანი ყარაბაღის კონფლიქტის ზონაში სრულად წყდება ცეცხლი და ყველა სამხედრო მოქმედება და აზერბაიჯანი და სომხეთი ჩერდებიან დაკავებულ პოზიციებზე;

2. აღდამის რაიონი და სომხური მხარის მიერ გაზახის რაიონში დაკავებული ტერიტორიები აზერბაიჯანს უბრუნდება 2020 წლის 20 ნოემბრამდე;

3. გამყოფი ხაზის და ლაჩინის დერეფნის გასწვრივ განთავსდება რუსეთის სამშვიდობო კონტინგენტი;

ამავე შეთანხმებით, სომხეთმა აზერბაიჯანს დაუბრუნა ქელბაჯარის რაიონი და ლაჩინის რაიონი და დაიტოვა ლაჩინის 5-კილომეტრიანი დერეფანი, რომელიც უზრუნველყოფს მთიანი ყარაბაღის კავშირს სომხეთთან, თუმცა არ შეეხება ქალაქ შუშას.

იძულებით გადაადგილებული პირები და დევნილები ბრუნდებიან მთიანი ყარაბაღის ტერიტორიაზე და მის მიდებარე რაიონებში გაეროს ლტოლვილთა უმაღლესი კომისარიატის კონტროლით.

მთიანი ყარაბაღისთვის ინტენსიური საბრძოლო მოქმედებები 27 სექტემბრიდან განახლდა. ამ პერიოდში აზერბაიჯანმა კონტროლი აღადგინა არაერთ რაიონზე. სულ ბოლოს, 9 ნოემბერს ქალაქ შუშაზე.

ფოტო: ria