ოპოზიცია ეცდება ივანიშვილის მორალური გადაწყვეტილება რამენაირად გააუფერულოს - მდინარაძე

ბიძინა ივანიშვილი არის ადამიანი, რომელმაც ამ ქვეყანაში უზრუნველყო დემოკრატიული განვითარების შეუქცევადი პროცესი, - ქართული ოცნების ლიდერი, მამუკა მდინარაძე, ბიძინა ივანიშვილის ღია წერილს ეხმიანება, რომელშიც ივანიშვილი ამბობს, რომ პოლიტიკიდან მიდის.

"ბუნებრივია, ადამიანურად ჩემთვის და, დარწმუნებული ვარ, ყველა ჩემი თანაგუნდელისთვის გულდასაწყვეტია მისი გადაწყვეტილება. ეს ადამიანური ფაქტორი აუცილებლად უნდა აღვნიშნოთ. ჩემი აზრით, ბიძინა ივანიშვილი არის ადამიანი, რომელმაც ამ ქვეყანაში უზრუნველყო დემოკრატიული განვითარების შეუქცევადი პროცესი. ამ დღეების განმავლობაში ძალიან ბევრ აბსურდულ ნარატივსა და მესიჯს ვნახავთ ოპოზიციისგან, ისინი ეცდებიან, ეს ძალიან, ერთი მხრივ თამამი, დემოკრატიული, მორალური სტანდარტებისა და დემოკრატიული სტანდარტების შესაბამისი გადაწყვეტილება რამენაირად გააუფერულონ", - ამბობს მდინარაძე.