კულტურის სამინისტრომ ხელოვნების სასახლისათვის გენერალ გიორგი მაზნიაშვილის კუთვნილი "სადარბაზო საათი" შეიძინა

საქართველოს კულტურის, სპორტისა და ახალგაზრდობის სამინისტრო სამუზეუმო ფონდების უნიკალური ექსპონატებითა და ხელოვნების ნიმუშებით შევსებას აგრძელებს.

ამჯერად, კულტურის ისტორიის მუზეუმის (ხელოვნების სასახლე) სამუზეუმო ექსპონატთა შემსყიდველი კომისიის გადაწყვეტილებით, მუზეუმმა კულტურის სამინისტროს მიერ გამოყოფილი თანხებით გამოყენებითი ხელოვნების ნიმუში, ე. წ. "სადარბაზო საათი" შეიძინა, რომელიც, გადმოცემის თანახმად, ქართველ მხედართმთავარსა და გენერალს, გიორგი მაზნიაშვილს ეკუთვნოდა.

საათის უკანა მხარეს არსებული დამღა ადასტურებს, რომ ის XIX დასასრულს გერმანიაში, კერძოდ ბერლინშია დამზადებული (მწარმოებელი სამეფო კარის ოსტატი G. Ellinghausen). ნივთი საქართველოში რუსეთის არმიის გენერალს, ლიტერატორ კონსტანტინე მამაცაშვილს ჩამოუტანია, რის შემდეგაც ის ჯერ გენერალ მაზნიაშვილს მიუღია საჩუქრად, შემდეგ კი ნივთი თბილისელ მოქალაქეებს შეუძენიათ.

"სადარბაზო საათი" წითელი ძვირფასმერქნიანი ხისგან არის დამზადებული. საათის მექანიზმი მუშაა და უახლოეს მომავალში ის ხელოვნების სასახლის მუდმივმოქმედ ექსპოზიციაში დაიდებს ადგილს.

კულტურის სამინისტროს მიერ მუზეუმებისთვის ექსპონატების შეძენა მიმდინარე წლის ივლისის თვიდან ეტაპობრივად ხორციელდება, რის შესახებაც საზოგადოებას ინფორმაცია სრულად მიეწოდება.

ინფორმაციას კულტურის სამინისტროს პრესსამსახური ავრცელებს.