ოლაფ შოლცმა პუტინთან შეხვედრის წინ, რუსი ექიმების მიერ PCR ტესტის გაკეთებაზე უარი თქვა

გერმანიის კანცლერმა ოლაფ შოლცმა 15 თებერვალს, ვლადიმირ პუტინთან შეხვედრამდე რუსული მხარის მიერ შეთავაზებული კორონავირუსის ტესტის გაკეთებაზე უარი თქვა. მან PCR ტესტი მოსკოვში გერმანიის საელჩოს გერმანელ ექიმთან გაიკეთა.

გერმანულმა მხარემ განაცხადა, რომ შოლცის ტესტირებაზე რუსეთის ჯანდაცვის უწყების წარმომადგენლები მიიწვიეს, ტესტირებისთვის საჭირო კომპლექტი კი გერმანიიდან ჩაიტანეს.  

რამდენიემ დღის წინ საფრანგეთის პრეზიდენტმა ემანუელ მაკრონმა მოსკოვში ვიზიტისას, რუსეთის პრეზიდენტ პუტინთან შეხვედრამდე, უარი თქვა კრემლის მოთხოვნაზე, გაეკეთებინა PCR ტესტი. სწორედ ამის გამო გახდნენ იძულებულები, მაკრონისა და პუტინის მოლაპარაკებების დროს, მათ შორის 4-მეტრიანი დისტანცია შეენარჩუნებინათ. როგორც იუწყებიან, ფრანგული მხარე ვერ დაუშვებდა საფრანგეთის პრეზიდენტის დნმ-ის ნიმუშის კრემლის ხელში მოხვედრას.

ოლაფ შულცი მოსკოვში დღეს, 15 თებერვალს ჩავიდა, სადაც პუტინთან მოლაპარაკებებს გამართავს. შეხვედრის მთავარი საკითხი უკრაინას შეეხება.