პრინც ენდრიუს წინააღმდეგ სექსუალური ძალადობის საქმე შეწყდა

გაერთიანებული სამეფოს დედოფლის, ელისაბედ მეორის ვაჟმა, პრინც ენდრიუმ სასამართლო პროცესამდე, სექსუალური ძალადობის საქმეზე მომჩინავ ვირჯინია ჯუფრესთან შეთანხმებას მიაღწია.

38 წლის ვირჯინია ჯუფრე იორკის ჰერცოგს სექსუალურ ძალადობაში ადანაშაულებდა და აცხადებდა, რომ მასთან სექსი სამჯერ აიძულეს, როდესაც ის 17 წლის იყო.

ვირჯინია ჯუფრე იმ ქალთა შორის იყო, ვინც ფინანსისტ ჯეფრი ეპშტეინს არასრულწლოვანთა სექსუალური ექსპლუატაციისთვის უჩივლა. ეპშტეინმა 2019 წელს ციხეში სიცოცხლე თვითმკვლელობით დაასრულა, როდესაც საქმეზე სასამართლო განხილვას ელოდა.

ჯუფრე და სხვა ქალები ამტკიცებდნენ, რომ ჯეფრი ეპშტეინი არასრულწლოვან გოგონებს ძალაუფლების მქონე მამაკაცებთან, სხვათა შორის პრინც ენდრიუსთან, სექსუალურ ურთიერთობას აიძულებდა.

პრინცი ენდრიუ კატეგორიულად უარყოფდა ბრალდებებს.

როგორც იუწყებიან, პრინცმა ენდრიუმ და ვირჯინია ჯუფრემ სასამართლოს გარეშე მიაღწიეს შეთანხმებას. შეთანხმების დოკუმენტი, რომელიც მკაცრად კონფიდენციალურია აშშ-ის სასამართლოს წარედგინა.

მედია წყაროებზე დაყრდნობით იუწყება, რომ შეთანხმების თანახმად, პრინცი ენდრიუ სოლიდურ კომპენსაციას გადაუხდის ჯუფრეს, ასევე მსხვილ შენატანს გააკეთებს სექსუალური ძალადობის მსხვერპლთა დახმარების ფონდში.

კომპენსაციის ოდენობა არ საჯაროვდება, თუმცა მედია ვარაუდობს, რომ ეს შეიძლება მილიონობით ფუნტი იყოს.

2022 წლის იანვარში, ბუკინგემის სასახლემ განაცხადა, რომ სექსუალური ძალადობის საქმეთან დაკავშირებით, დედოფლის განკარგულებით, პრინც ენდრიუს სამხედრო წოდებები და "მისი სამეფო უმაღლესობის" (HRH – His Royal Highness) ტიტულის ტარების უფლება.