მარიუპოლს ანადგურებენ, უმოწყალოდ ბომბავენ, გთხოვთ, დაგვეხმარეთ, გაიხსნას დერეფანი ევაკუაციისათვის - ქალაქის მერი

რუსეთის საოკუპაციო ძალები მეხუთე დღეა უმოწყალოდ ბომბავს მარიუპოლს. ანადგურებენ მის ინფრასტრუქტურას - ქალაქში არ არის გათბობა, წყალი, ელეტქროენერგია.

საავადმყოფოებში არიან დაჭრილები, მაგრამ საავადამყოფოებსაც ბომბავენ. ამის შესახებ მარიუპოლის მერმა ვადიმ ბოიჩენკომ უკრაინის ტელეარხების ეთერში განაცხადა.  

„მარიუპოლი მეხუთე დღეა უმოწყალო დაბომბვის ქვეშ არის. ჩვენ გვანადგურებენ „გრადებით“ ჰაუბიცებით, ავიაციით. ცეცხლი ერთი წუთითაც კი არ წყდება. სტაბილიზაციაზე საუბარი შეუძლებელია“, - თქვა ბოიჩენკომ.

მისი თქმით, ექიმები ყოველ დღე იბრძვიან მარიუპოლელების გადასარჩენად. ისინი საავადმყოფოებში გადავიდნენ, ოჯახებთან ერთად. მაგრამ რუსეთის არმია საავადმყოფოებსაც ბომბავს.

„მარიუპოლის ფორპოსტზე დღეს უკრაინული დროშა ფრიალებს. მაგრამ ჩვენ გვჭირდება სამხედრო დახმარება, დერეფანი, ცეცხლის შეწყვეტა, რათა მოვახდინოთ მშვიდობიანი მოსახლეობის ევაკუაცია. გთხოვთ, გევედრებით, დაეხმარეთ მარიუპოლს“, - ამბობს ქალაქის მერი.

ბოიჩენკომ აღნიშნა, რომ 3 მარტს უკრაინა-რუსეთის მოლაპარაკებაზე ერთ-ერთი პუნქტი იყო მწვანე დერეფნის გახსნა მარიუპოლისათვის.

„ახლა ჩვენ რამდენადაც შესაძლებელია ორგანიზებას ვუკეთებთ, რათა ეს მარშრუტი გაჩნდეს. ვამზადებთ შესაბამის ევაკუაციას. მაგრამ ჯერ ცეცხლი შეწყვეტილი არ არის, ამის გაკეთება ძალიან რთულია, მოგვიწევს ძალიან დიდი სამუშაო, მაგრამ უპირველესად საჭიროა ცეცხლის შეწყვეტა“, - თქვა მერმა.

„არ ვიცი, უნდა თუ არა რუსეთს ეს. შესაძლოა, მას სურს მარიუპოლის მიწასთან გასწორება“, - დაამატა ბოიჩენკომ.