კიევი, ოკუპანტების ინტენსიური ცეცხლის ქვეშ მყოფი გოსტომელიდან და ბუჩიდან მოსახლეობის ევაკუაციაზე მოლაპარაკებებს აწარმოებს - არესტოვიჩი

უკრაინა მოლაპარაკებებს აწარმოებს ოკუპანტების ინტენსიური ცეცხლის ქვეშ მყოფი გოსტომელიდან და ბუჩიდან მოსახლეობის ევაკუაციის შესახებ.

უკრაინის პრეზიდენტის ოფისის ხელმძღვანელის მრჩეველმა ოლექსეი არესტოვიჩმა მედიას განუცხადა, რომ საერთაშორისო ჰუმანიტარულ ორგანიზაციებთან განიხლავენ ბუჩიდან და გოსტომელიდან მოსახლეობის ევაკუაციის საკითხს.

„ეს საკითხი მაღალ დონეზე განიხილება საერთაშორისო ჰუმანიტარულ ორგანიზაციებთან, რუსეთთან შუამავლების მეშვეობით, რომ მოსახლოება ბუჩიდან და გოსტომელიდან გავიდეს... მტერმა ფაქტობრივად დაიკავა ბუჩა და გოსტომელი. იქ ჩვენი მოსახლეობა ფაქტობრივად მძევლებად ჰყავთ. ალყა შემოარტყეს მარიუპოლსაც... ეს ეხება მწვანე დერეფნებს, ვფქირობ, რომ ეს საკითხი გადაწყდება“, - განაცხადა არესტოვიჩმა.

არესტოვიჩის თქმით, გოსტომელსა და ბუჩაში უკრაინული ძალები ახალ პოზიციებზე გადავიდა, რათა საფრთხე არ შექმნოდა მშვიდობიან მოსახლეობას, მაგრამ რუსები შევიდნენ, დაჭრილია უამრავი ბავშვი და მათი გამოყვანის გზები არ არსებობს. ბავშვები თავს აფარებენ სარდაფებს, დაღუპულებს შორის არიან ბავშვები. მისივე თქმით, კიევის ჩრდილო-აღმოსავლეთით მტერი დაბნეულია, ამ მიმართულებით უკრაინული ძალები მას სარაკეტო და საჰაერო დარტყმებს აყენებენ, მტრის შეკავებას განაგრძობს სახმელეთო არმიაც.