პუტინს თუ არ გავაჩერებთ, ნატო-ს ქვეყნებსაც დაარტყამს - ევროკომისიის ვიცე-პრეზიდენტი

ევროკომისიის ვიცე-პრეზიდენტმა ვალდის დომბროვსკისმა განაცხადა, რომ თუ ვლადიმირ პუტინს უკრაინაში არ გააჩერებენ, მისი შემდეგი მსხვერპლი, შესაძლოა გახდნენ ლიეტუვა, ლატვია და ესტონეთი. იუწყება Politico.

ევროკომისრის თქმით, ევროკავშირი სერიოზულად უნდა მოეკიდოს რუსულ საფრთხეს, მოსკოვის მიმართ ბრიუსელის მრავალწლიანი ორაზროვანი პოზიციის შემდეგ.

„ეს {ომი} უკრაინით არ დასრულდება. ცხადია, ახლა პუტინი გარკვეულ აგრესიულ სამხედრო განწყობაზეა და სამწუხაროდ, არსებობს ალბათობა, რომ ეს აგრესია სხვა ქვეყნებშიც გაგრძელდეს“, - განაცხადა მან.

შეკითხვაზე, გულისხმობს თუ არა ის მოლდოვას, დომბროვსკისმა ბალტიის ქვეყნები დაასახელა: „ დააკვირდთ რუსეთის აგრესიული რიტორიკის ესკალაციასა და განცხადებებს, ის ადასტურებს, რომ რუსეთი ემხრობა ბელარუსის ინტერესებს ბალტიის ზღვის მიმართ და მზარდ ანტიბალტიურ რიტორიკას, უკრაინის შემთხვევაშიც ხომ ასე დაიწყო - ანტიუკრაინული რიტორიკის გაძლიერებით“, - თქვა დომბროვსკისმა.

პუტინის მხრიდან ბირთვული იარაღით მუქარის შესახებ საუბრისას ევოკომისარმა განაცხადა, რომ რუსეთის პრეზიდენტი ბირთვულ იარაღს შანტაჟის სახით ყოველთვის გამოიყენებს და თავის აგრესიულ ქმედებებს გააგრძელებს.

„საკითხი დგას ასე, რამდენად დავექვემდებარებით ამ შანტაჟს. რადგან მისი {შანტაჟის} გამოყენება ყოველთვის ყველაფრის წინააღმდეგ შეუძლია. პუტინი გააგრძელებს თავის აგრესიულ ომებს, ის ყოველთვის გამოიყენებს ამ შანტაჟს. ეს გაკვეთლები, ადრე უნდა გვესწავლა. აგრესორის დამშვიდება არ მუშაობს  და ის ნებისმიერი საშუალებით უნდა გავაჩეროთ“, - განაცხადა ევროკომისარმა.