პატრიარქი უკრაინაში დაღუპული ქართველი მებრძოლების ოჯახებს სამძიმარს უცხადებს

საქართველო, თბილისი - 12:27 | 26.03.2022

ნანახია: 421

საქართველოს კათოლიკოს-პატრიარქი ილია მეორე უკრაინაში დაღუპული ქართველი მებრძოლების ოჯახებს სამძიმარს უცხადებს.

"სამწუხაროდ, გლოვა გვიწევს ჩვენი მოხალისე ჯარისკაცების გამო. ამჟამად ვეთხოვებით უკრაინის ომში გარდაცვლილთ. ისინი მოყვასის სიცოცხლის გადასარჩენად იბრძოდნენ და თავიც შესწირეს.

სხვისთვის სიცოცხლის გაღება უდიდესი მსხვერპლია!

აღვავლენთ ლოცვებს გიორგი (გია) ბერიაშვილის, დავით რატიანისა და ბახვა ჩიქობავასთვის, რათა უფალმან სავანესა მართალთასა დააწესოს მათი უკვდავი სულნი, ხოლო ოჯახის წევრებსა და ახლობლებს მოანიჭოს მშვიდობა, ლოცვის ძალა და ურყევი რწმენა იმისა, რომ სიცოცხლე არ მთავრდება გარდაცვალებით, არამედ იგია დასაწყისი მარადიული ცხოვრებისა, რომლისთვისაც თითოეული ჩვენგანი უნდა მოემზადოს", - ნათქვამია პატრიარქის სამძიმრის წერილში.

18 მარტს, გია ბერიაშვილი და დავით რატიანი კიევის ჩრდილო-დასავლეთით, ირპინის ფრონტზე დაიღუპნენ. 19 მარტს, ბახვა ჩიქობავა, ქალაქ მარიუპოლში დაიღუპა.

გია ბერიაშვილისა და დავით რატიანის ცხედრები საქართველოში უკვე ჩამოასვენეს, ჯერჯერობით ვერ ხერხდება ბახვა ჩიქობავას ცხედრის ჩამოსვენება.