აშშ არ აღიარებს რუსეთის ან მისი მარიონეტების მიერ საქართველოს სუვერენული ტერიტორიის დაყოფის მცდელობებს - ნედ პრაისი

შეერთებული შტატების სახელმწიფო დეპარტამენტის პრესსპიკერის ნედ პრაისის განცხადებით, აშშ არ აღიარებს რუსეთის ან მისი მარიონეტების მიერ საქართველოს სუვერენული ტერიტორიის დაყოფის მცდელობებს. ამის შესახებ პრაისმა დეპარტამენტში გამართულ ბრიფინგზე, ჟურნალისტების მიერ დასმული შეკითხვის საპასუხოდ განაცხადა.

"ჩვენ არ ვაღიარებთ რუსეთის ან მისი მარიონეტების ნებისმიერი ძალისხმევის შედეგს, რაც მიმართული იქნება საქართველოს სუვერენული ტერიტორიის დაყოფისკენ. ჩვენ ვიმეორებთ, რომ მტკიცედ ვუჭერთ მხარს საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში“, – განაცხადა ნედ პრაისმა.

ამავდროულად, ნედ პრაისმა კიდევ ერთხელ დაგმო რუსეთის მიერ საქართველოს რეგიონების ოკუპაცია და მოუწოდა მოსკოვს, შეასრულოს 2008 წლის ცეცხლის შეწყვეტის შეთანხმებით ნაკისრი ვალდებულებები, რაც ჯარების გაყვანას გულისხმობს.

"ჩვენ ვგმობთ რუსეთის მიერ საქართველოს შემადგენელი ნაწილების ოკუპაციას. ჩვენ მოვუწოდებთ რუსეთს, შეწყვიტოს საქართველოს რეგიონების, აფხაზეთისა და სამხრეთ ოსეთის ოკუპაცია და შეასრულოს 2008 წლის ცეცხლის შეწყვეტის შეთანხმებით აღებული ვალდებულებები, რაც მოიცავს რუსეთის ჯარების გაყვანას კონფლიქტამდელ პოზიციებზე/;, - განაცხადა პრაისმა.

პრესსპიკერის განცხადებით, რუსეთს და ოკუპირებული რეგიონის დე ფაქტო მთავრობას არ აქვთ უფლება, გადაწყვეტილება მიიღოს სამხრეთ ოსეთის მომავლის შესახებ.

"არც დე ფაქტო მთავრობას და არც რუსეთის ოფიციალურ პირებს არ აქვთ უფლება, მიიღონ გადაწყვეტილებები სამხრეთ ოსეთის მომავლის შესახებ, რომელიც არის საქართველოს შემადგენელი ნაწილი. ისევე როგოც აშშ არ აღიარებს რუსეთის მიერ ყირიმის არალეგალურ დაკავებას და ანექსიის მცდელობას 2014 წელს, ასევე არ ვაღიარებთ კრემლის ცინიკურ მცდელობას, აღიაროს ე.წ. დონეცკისა და ლუგანსკის სახალხო რესპუბლიკების დამოუკიდებლობა, რაც წინ უძღოდა რუსეთის მხრიდან უკრაინაში არაპროვიცირებულ შეჭრას", - განაცხადა პრაისმა.

შეგახსენებთ, 30 მარტს ცნობილი გახდა, რომ რუსეთის მიერ ოკუპირებული ცხინვალის დე ფაქტო მთავრობა რუსეთთან მიერთების თაობაზე „რეფერენდუმის“ ჩატარებას აპირებს.