რუსეთის თავდასხმები მშვიდობიანი მოსახლეობის წინააღმდეგ ომის დანაშაულების კიდევ უფრო მეტი მტკიცებულებაა, ყველაფერს გავაკეთებ პუტინის სამხედრო მანქანის გამოფიტვისთვის - ჯონსონი

რუსეთის თავდასხმები მშვიდობიანი მოსახლეობის წინააღმდეგ ომის დანაშაულების კიდევ უფრო მეტი მტკიცებულებაა,  ყველაფერს გავაკეთებ პუტინის სამხედრო მანქანის გამოფიტვისთვის, - ამის შესახებ ბრიტანეთის პრემიერ-მინისტრმა, ბორის ჯონსონმა განაცხადა.

მან ბუჩასა და ირპინში მშვიდობიან მოქალაქეებზე რუსეთის თავდასხმები დაგმო და თქვა, რომ სამართლის აღსასრულებლად ყველაფერს გააკეთებს.

„რუსეთის საზიზღარი თავდასხმები ირპინსა და ბუჩაში უდანაშაულო მშვიდობიანი მოსახლეობის წინააღმდეგ კიდევ უფრო მეტი მტკიცებულებაა იმისა, რომ პუტინი და მისი არმია უკრაინაში სამხედრო დანაშაულებს სჩადიან. კრემლის ვერც ერთი უარყოფა ან დეზინფორმაცია ვერ მალავს იმას, რაც ყველამ ვიცით, რომ სიმართლეა – პუტინი სასოწარკვეთილია, მისი შეჭრა მარცხდება და უკრაინის სიმტკიცე არასოდეს ყოფილა ასეთი ძლიერი. ყველაფერს გავაკეთებ პუტინის ომის მანქანის გამოფიტვისთვის. გაერთიანებული სამეფო უკრაინაში ჩადენილი სისასტიკისთვის საერთაშორისო სისხლის სამართლის სასამართლოს გამოძიების მხარდაჭერის სათავეშია“, – განაცხადა ბორის ჯონსონმა.