საფრანგეთი 30-მდე რუს დიპლომატს აძევებს

საფრანგეთის მთავრობა ქვეყნიდან რუს დიპლომატებს გააძევებს. ამის შესახებ ევროპისა და საგარეო საქმეთა სამინისტროს განცხადებაშია ნათქვამი.

"საფრანგეთმა დღეს საღამოს გადაწყვიტა, გააძევოს საფრანგეთში დიპლომატიური სტატუსით განთავსებული რუსეთის საელჩოს მრავალი პერსონალი, რომელთა საქმიანობა ეწინააღმდეგება ჩვენს უსაფრთხოების ინტერესებს.

ჩვენი პირველი პასუხისმგებლობა ყოველთვის არის საფრანგეთისა და ევროპელი მოქალაქეების უსაფრთხოების უზრუნველყოფა", - ნათქვამია სამინისტროს განცხადებაში.

საგარეო საქმეთა სამინისტროს ქვეყნიდან გასაძეევებელ დიპლომატთა რაოდენობა არ დაუკონკრეტებია, თუმცა ფრანგული მედია წყაროზე დაყრდნობით იუწყება, რომ საუბარია, დაახლოებით, 30-მდე დიპლომატზე.

რუსეთის საგარეო საქმეთა სამინისტროს წარმომადგენელმა მარია ზახაროვამ განაცხადა, რომ პარიზის გადაწყვეტილება საფრანგეთიდან 30 რუსი დიპლომატის გაძევების შესახებ უპასუხოდ არ დარჩება.

ცოტა ხნით ადრე, გერმანიამ 40 რუსი დიპლომატი გააძევა.

მანამდე, ცნობილი გახდა, რომ ლიეტუვამ და ლატვიამ, ბუჩაში ჩადენილი ხოცვა-ჟლეტის გამო, რუსეთთან დიპლომატიური ურთიერთობების დონის დაწევა გადაწყვიტეს. შედეგად, რიგამ და ვილნიუსმა რუსეთის ელჩები გააძევეს და მათი ელჩები მოსკოვიდან გამოიხმეს.