თუ ვინმე აბრკოლებს ევროკავშირში სწრაფი გაწევრიანების პერსპექტივას, ეს არის პრემიერ-მინისტრი საკუთარი პოლიტიკური განცხადებებით - თამარ კორძაია

ვინმე თუ აბრკოლებს ევროკავშირში სწრაფი გაწევრიანების პერსპექტივას, ეს არის პრემიერ-მინისტრი საკუთარი პოლიტიკური განცხადებებით, - ამის შესახებ პარლამენტის წევრმა, თამარ კორძაიამ საპარლამენტო უმრავლესობას პლენარულ სხდომაზე განაცხადა და უმრავლესობას მოუწოდა თავი შეიკავოს ომში მყოფი ქვეყანსისთვის პოლიტიკური ულტიმატუმების წაყენებისგან.

"გთხოვთ, იქნებ, თქვენც თავი შეიკავოთ და ომში მყოფ ქვეყანას პოლიტიკური ულტიმატუმები არ წაუყენოთ. ვაცალოთ გამარჯვება და მერე ელაპარაკეთ რაზეც გინდათ, ოღონდ ეს გზა გავიაროთ როგორმე ყველამ ერთად", – განაცხადა თამარ კორძაიამ .

კორძაიას თქმით, როდესაც უმრავლესობა საუბრობს, რომ ევროკავშირის წევრობასთან დაკავშირებით საქართველოსთვის კითხვარის გადმოცემა და სწრაფი გაწევრიანების პერსპექტივა ჩვენი მტკიცე სვლის შედეგია, ეს ასე არ არის.

„ეს არ არის მხოლოდ ჩვენი მტკიცე სვლის შედეგი. ეს არის პოლიტიკური გადაწყვეტილება, რომლის საფუძველია უკრაინაში მიმდინარე თავგანწირული ბრძოლა თავისუფლებისთვის, ეს არის პოლიტიკური გადაწყვეტილება რუსეთის აგრესიასთან მიმართებაში და როდესაც ჩვენს წვლილზე ვლაპარაკობთ, ცოტა მოკრძალებულიც უნდა ვიყოთ და ვთქვათ იმაზე, თუ რა ხდება და დავუფასოთ იმათაც, ვინც იბრძვის ჩვენთან ერთად“, – აღნიშნა თამარ კორძაიამ.