შოიგუმ პუტინს მოატყუა „მარიუპოლის აღების“ შესახებ - უკრაინული მედია

რუსეთის თავდაცვის მინისტრმა სერგეი შოიგუმ აგრესორი ქვეყნის პრეზიდენტს ვლადიმირ პუტინს მოატყუა „მარიუპოლის აღების“ შესახებ, თუმცა შემდეგ დაამატა, რომ ქალაქში ორი ათასზე მეტი უკრაინელი დამცველი რჩება. უკრაინული მედია კრემლში პუტინისა და შოიგუს განცხადებების შესახებ წერს.

შოიგუმ მარიუპოლს „ნაციონალისტური აზოვის დედაქალაქი“ უწოდა და პუტინს მოახსენა, რომ ქალაქის ალყაში მოქცევის მომენტში იქ უკრაინული ძალების 8 100-მდე წევრი იმყოფებოდა. ახლა კი 2 ათასზე მეტი მებრძოლი „აზოვსტალის“ ტერიტორიაზე „საიმედოდ“ არის ბლოკირებული.

ამასთან, შოიგუმ როგორც მთელი გასული წლის განმავლობაში ისევ გაიმეორა, რომ „აზოვსტალის“ ოპერაციის დასრულებას სამი-ოთხი დღეს დასჭირდება.

აქვე მინისტრმა პუტინს „აზოვსტალის“ შტურმი შესთავაზა. საპასუხოდ პუტინს „სავარაუდოდ ეს იდეა არ მოეწონა და აღნიშნა, რომ არ არისსაჭირო კატაკომბებში ჩაძვრომა და მიწის ქვეშ ხოხვა, მაგრამ აუცილებელია „აზოვსტალის“ სამრეწველო ზონის გადაკეტვა, რათა იქ ბუზიც ვერ შეფრინდეს“.პუტინმა  „აზოვსტალის“ სამრეწველო ზონის შტურმის გაუქმების ბრძანება გასცა.

იმის მიუხედავად, რომ ქალაქის დიდი ნაწილი რუს ოკუპანტებს აქვთ დაპყრობილი, მარიუპოლის დამცველები მედგარ წინააღმდეგობას უწევენ და ოკუპანტებისა და სამხედრო ტექნიკის ლიკვიდაციის შესახებ იუწყებიან კერძოდ, „აზოვის“ პოლკის ინფორმაციით, ბოლო ორ დღეში მათ მტრის სამი ტანკი, 2 ქვეითთა საბრძოლო ჯავშანმანქანა და ჯავშანტრანსპორტიორი გაანადგურეს.

ამასთან, 20 აპრილს ცნობილი გახდა, რომ 36-ე ცალკეული საზღვაო ბრიგადის სამხედროებმა, უკრაინის შეიარაღებული ძალების სხვა დანაყოფებთან და ეროვნულ გვარდიასთან ერთად წარმატებული სპეცოპერაცია ჩაატარეს მესაზღვრეებისა და პოლიციელების ევაკუაციისთვის „აზოვსტალის“ ქარხანაში.