ალი უზდენოვთან ერთად საქართველოში გავმართე შეხვედრები ბიზნესსექტორთან, მეხორბლეებთან - დავით ხიდაშელი

ბიზნესმენი, "კარტოგრაფების საქმის" ერთ-ერთი მთავარი მოწმე დავით ხიდაშელი განცხადებას ავრცელებს, რომელშიც ის 25 აპრილს გავრცელებულ სატელეფონო ჩანაწერს ეხმიანება. განცხადებაში, რომელიც მედიით ვრცელდება, ხიდაშელი ამბობს, რომ ბიძინა ივანიშვილთან და ირაკლი ღარიბაშვილთან არანაირი შეხვედრა არ გამართულა. მისი თქმით, ალი უზდენოვთან ერთად საქართველოში შეხვედრები ჰქონდა ბიზნესსექტორთან, მეხორბლეებთან.

"პირველ რიგში, აღვნიშნავ, რომ ალი უზდენოვი არის ბიზნესმენი და არანაირი კავშირი არ აქვს პოლიტიკასთან. მოგეხსენებათ, საქართველოში ღვინის კონსორციუმის შექმნა დავიწყე და გეგმაში მაქვს ღვინის ექსპორტის მნიშვნელოვანი ზრდა.

გარდა ამისა, ვამუშავებ შესაძლებლობას, რომ რუსეთში ღვინის რეალიზაციის შედეგად მიღებული თანხებით მოხდეს ხორბლის შემოტანა რუსეთიდან, ვინაიდან საქართველოში არის ხორბლის საჭიროება.

ალი უზდენოვთან ერთად სწორედ ამასთან დაკავშირებით გავმართე შეხვედრები საქართველოში ბიზნეს სექტორთან, მეხორბლეებთან. ბიძინა ივანიშვილთან არანაირი შეხვედრა არ გამართულა. რაც შეეხება პრემიერთან შეხვედრას, ასეთი შეხვედრა არ შემდგარა. მე მქონდა კომუნიკაცია პრემიერ-მინისტრთან, ვთხოვე შეხვედრა, თუმცა პრემიერმა გადაგვამისამართა ბიზნეს სექტორთან. აქვე განვმარტავ, რომ ბიზნეს სექტორთან შეხვედრები რაიმე კონკრეტული შეთანხმებით და შედეგით არ დასრულებულა" - ნათქვამია დავით ხიდაშელის განცხადებაში.

გუშინ, 25 აპრილს გავრცელდა აუდიოჩანაწერები, სადაც, სავარაუდოდ, ბიძინა ივანიშვილსა და რუს სანქცირებულ ოლიგარქს, ვლადიმერ ევტუშენკოვს შორის საუბარი ისმის.

ჩანაწერში, სავარაუდოდ, ევტუშენკოვი ივანიშვილს სთხოვს სანქციების გვერდის ავლით მოქმედებას, თუ მასაც აქვს ამის სურვილი. ისმის სახელები და გვარები - მათ შორის ახსენებენ სანქცირებული რუსი ოლიგარქის კომპანიაში ვიცე-პრეზიდენტის ალი უზდენოვის ვიზიტს საქართველოში.

გავრცელებულ ჩანაწერში, სადაც ორ სხვადასხვა დროს შემდგარი სავარაუდო ლაპარაკია ნაჩვენები, სავარაუდოდ ივანიშვილი სავარაუდოდ ევტუშენკოვს ეუბნება, რომ "სიტუაცია არასახარბიელოა, მაგრამ გაძლებაა საჭირო, რას იზამ". ამის შემდეგ, სავარაუდოდ ევტუშენკოვი თანამოსაუბრეს ეუბნება, რომ რაღაცას "მანდ დავითი მოიტანს", რაც მისივე თქმით, ივანიშვილსაც დააინტერესებს და სხვებსაც.

თავად ვლადიმერ ევტუშენკოვმა "ფორმულასთან" ინტერვიუში დაადასტურა, რომ ალი უზდენოვი საქართველოში იმყოფებოდა და პრემიერ-მინისტრთანაც გამართა შეხვედრა.