რუსებმა სოლედარის მძლავრი შტურმი წამოიწყეს, მიმდინარეობს სასტიკი ბრძოლები - ანა მალიარი

დონეცკის ოლქში, სოლედარის აღების წარუმატებელი მცდელობის შემდეგ რუსეთის ძალებმა ტაქტიკა შეცვალა და ახალი მძლავრი შტურმი დაიწყო. ამის შესახებ თავდაცვის მინისტრის მოადგილემ ანა მალიარიმ განაცხადა.

„სოლედარის აღების წარუმატებელი შტურმისა და უკან დახევის შემდეგ მტერი გადაჯგუფდა, აღიდგინა დანაკარგები, გადაისროლა დამატებითი შემტევი რაზმები, შეცვალა ტაქტიკა და წამოიწყო მძლავრი შტურმი.

მტერმა აამოქმედა დიდი რაოდენობით შემტევი ჯგუფები, რომლებიც ფორმირებულია ვაგნერელების საუკეთესო რეზერვებიდან.

მტერი თავისივე ჯარისკაცების ცხედრებზე გადავლით, მასირებულად იყენებს არტილერიას, ზალპური ცეხლის სისტემებსა და ნაღმტყორცნებს, ცეხლით ფარავს თავისივე მებრძოლებსაც კი“, - განაცხადა მალიარიმ.

მალიარი ირწმუნება, რომ უკრაინელი დამცველები მამაცურად იცავენ მშობლიური მიწის ყოველ გოჯს. მისი მისი თქმით, ამ წუთებში უსასტიკესი ბრძოლები მიმდინარეობს.

მანამდე, დღეს, 9 იანვარს სახმელეთო ძალების მეთაურმა ალექსანდრ სირსკიმ განაცხადა,  რომ რუსეთის განცხადება, სოლედარის აღების შესახებ სიმართელს არ შეესაბამება. მისი თქმით, მტერმა მნიშვნელოვანი დანაკარგი განიცადა და მორიგ ჯერზე უკან დაიხია.