ფინეთმა უკრაინისათვის 400 მლნ ევროს მოცულობის ახალი სამხედრო დახმარების პაკეტის გამოყოფის შესახებ განაცხადა

ფინეთმა უკრაინისათვის 400 მილიონი ევროს მოცულობის ახალი სამხედრო დახმარების პაკეტის გამოყოფის შესახებ განაცხადა. ქვეყნის თავდაცვის სამინისტროს 20 იანვრის განცხადებაში ნათქვამია, რომ უკრაინისათვის განკუთვნილი სამხედრო დახმარება მომავალში კიდევ უფრო გაიზრდება და 590 მილიონ ევროს მიაღწევს.

აღნიშნული გადაწყვეტილება ქვეყნის პრეზიდენტმა მთავრობის წინადადების საფუძველზე 19 იანვარს მიიღო.

ამასთან, ფინეთის სამხედრო უწყების წარმომადგენელმა განაცხადა, რომ დახმარების კომპლექტში არ იქნება Leopard 2-ის მარკის ტანკები.

საერთაშორისო ზეწოლის მიუხედავად, გერმანია უარს ამბობს და არც ნატოს სხვა მოკავშირეებს აძლევს თანხმობას, რომ უკრაინას გერმანული მოდელის ტანკები გადასცენ.

19 იანვარს  გამართულ შეხვედრაზე ევროპის ცხრა ქვეყნის თავდაცვის მინისტრებმა და თავდაცვის სამინისტროს წარმომადგენლებმა ხელი მოაწერეს "ტალინის დეკლარაციას", რომლითაც აიღეს ვალდებულება, რომ  სამხედრო დახმარება გაუწიონ უკრაინის არმიას.

დანიამ განაცხადა, რომ უკრაინას გადასცემს თავის შეიარაღებაში არსებულ 19 ფრანგულ თვითმავალ ჰაუბიცა „სეზარს“, რომელიც ამ ტიპის იარაღებში საუკეთესოდ ითვლება მსოფლიოში.

ესტონეთმა და ლიეტუვამ გამოაცხადეს რეკორდული დახმარების პაკეტები, ხოლო დიდი ბრიტანეთი აცხადებს, რომ სხვა სამხედრო დანიშნულების პროდუქციასთან ერთად, უკრაინას Brimstone-ის კლასის 600 რაკეტას გადასცემს.

ამასთან, პოლონეთის პრემიერ-მინისტრი მატეუშ მორავიეცკი არ გამორიცხავს, რომ ვარშავამ უკრაინას Leopard 2-ის ტანკები გერმანიის ნებართვის გარეშე გადასცეს.

დღეს, 20 იანვარს  "რამშტაინის" ამერიკულ სამხედრო ბაზაზე ათობით მოკავშირე შეიკრიბება, რომლებიც უკრაინისთვის შეიარაღების მიწოდების საკითხს განიხილავენ. „რამშტაინის“ ბაზაზე უკვე ჩავიდა აშშ-ის თვადაცვის მდივანი ლოიდ ოსტინი. შეხვედრაზე მთავარი თემა უკრაინის შეიარაღებული ძალებისთვის „ლეოპარდის“ ტანკების მიწოდება იქნება.