უკრაინის ქალაქებზე რუსეთის ძალების სარაკეტო იერიშს, სულ მცირე, 11 ადამიანი ემსხვერპლა

საქართველო, თბილისი - 20:04 | 26.01.2023

ნანახია: 433

უკრაინის ქალაქებზე რუსეთის ძალების მიერ მიტანილ სარაკეტო იერიშს დღეს, სულ მცირე, 11 ადამიანი ემსხვერპლა. შესაბამის მონაცემებს უკრაინის საგანგებო სიტუაციების სახელმწიფო სამსახურის წარმომადგენელი ალექსანდრ ხორუნჯი ავრცელებს. მისი ცნობით, დაშავებულია 11 ადამიანი.

დღეს რუსეთის არმიამ უკრაინის ქალაქებზე მასშტაბურ სარაკეტო იერიშები მიიტანა. უკრაინის დედაქალაქის მერის, ვიტალი კლიჩკოს განცხადებით, კიევის გოლოსეევსკის რაიონში რაკეტის ჩამოვარდნის შედეგად დაიღუპა ერთი ადამიანი, ორი დაშავებული ჰოსპიტალიზებულია. უკრაინის საჰაერო თავდაცვის სისტემა ამუშავდა ვინიცის, დნეპროპეტროვსკის, ოდესის, ჟიტომირის ოლქებში. ქალაქ ოდესაში რამდენიმე აფეთქება მოხდა. ქალაქში ორი ელექტროსადგური დაზიანდა.

ცნობილია, რომ სარაკეტო და უპილოტო თვითმფრინავების იერიშის შედეგად 2 ხანძარი გაჩნდა, დაზიანდა 35 შენობა.

დაზიანებული შენობების უმეტესობა, კერძოდ კერძო და საცხოვრებელი მაღალსართულიანი შენობები კიევის რეგიონშია.