არსებობს კონსესუსი, რომ უკრაინა დასავლეთის შეიარაღებას რუსეთის ტერიტორიაზე შეტევისთვის არ გამოიყენებს - შოლცი

გერმანიის კანცლერ ოლაფ შოლცის განცხადებით, უკრაინის პრეზიდენტთან ვილოდიმირ ზელენსკისთან არსებობს კონსესუსი, რომ იარაღს, რომელსაც დასავლეთი უკრაინას აწვდის რუსეთის ტერიტორიაზე იერიშისთვის არ გამოიყენებენ.

ამის შესახებ მან Bild-თან ინტერვიუში განაცხადა.

„ამასთან დაკავშირებით არსებობს კონსესეუსი“, - თქვა შოლცმა.

ამის გარდა, გერმანიის კანცლერმა უარყო პუტინის განცხადება, რომ გერმანული ტანკები ისევ ემუქრებიან რუსეთს. შოლცმა თქვა: „მისი სიტყვები ისტორიული შედარებების აბსურდული სერიის ნაწილია, რომელსაც ის უკრაინაზე თავდასხმის გამართლებისთვის იყენებს. მაგრამ ამ ომის გამართლება არაფრით შეიძლება. რუსეთი აწარმოებს უმოწყალო ომს უკრაინის წინააღმდეგ“.

მანვე განმარტა თუ რა პრინციპით უწევს გერმანია უკრაინას სამხედრო დახმარებას.

 „ჩვენს მოკავშირეებთან ერთად ვაწვდით უკრაინას საბბრძოლო ტანკებს, რათა მათ თავდაცვაში დავეხმაროთ. ჩვენ გულდასმით განვიხილეთ იარაღის მიწოდების საკითხი ჩვენს თითოეულ მოკავშირესთან, უპირველესად კი ამერიკასთან ერთად. ასეთი ერთობლივი მიდგომა ხელს შეუშლის ომის ესკალაციას“, - განაცხადა შოლცმა.

შეგახსენებთ, გერმანიამ 25 იანვარს მიიღო გადაწყვეტილება უკრაინისთვის Leopard-2-ის ტიპის ტანკების მიწოდებასთან დაკავშირებით.