საქართველომ რუსეთს საჰაერო მიმოსვლის აღდგენის თხოვნით თავად მიმართა - ჯაბაროვი

რუსეთის ფედერაციის საბჭოს საერთაშორისო საქმეთა კომიტეტის თავმჯდომარის პირველმა მოადგილემ ვლადიმირ ჯაბაროვმა განაცხადა, რომ საქართველომ თავად მიმართა რუსეთს საჰაერო მიმოსვლის აღდგენის თხოვნით. ჯაბაროვის განცხადებით, მიმართვა რამდენიმე კვირის წინ გაკეთდა და საუბარი იყო რუსული ავიაკომპანია „აეროფლოტის“ რეისების აღდგენაზე.

რუსეთის საგარეო საქმეთა მინისტრმა სერგეი ლავროვმა 18 იანვარს გამართულ ბრიფინგზე განაცხადა: "საქართველოს უნარი, წინააღმდეგობა გაუწიოს დასავლეთის ზეწოლას, რომელიც ღიად ითხოვს ანტირუსულ სანქციებთან შეერთებას, პატივისცემას იმსახურებს". ამასთან, მან იმედი გამოთქვა, რომ რუსეთსა და საქართველოს შორის პირდაპირი ავიამიმოსვლა აღდგება.

„ქართული ოცნების" თავმჯდომარემ ირაკლი კობახიძემ თქვა, რომ ფრენების აღდგენა მნიშვნელოვანი იქნება საქართველოს მოქალაქეებისთვის.

პირდაპირი ავიამიმოსვლა საქართველოსა და რუსეთს შორის 2019 წლის 8 ივლისს შეწყდა.