სადახლოს საბაჟო-გამშვებ პუნქტზე საზღვრის მონიტორინგის თანამედროვე სისტემა ამოქმედდა

ევროკავშირის აღმოსავლეთ პარტნიორობის პროგრამის ინტეგრირებული საზღვრის მართვის საპილოტე პროექტის ფარგლებში, შემოსავლების სამსახურის საბაჟო გამშვებ პუნქტს ”სადახლოს” სატვირთო მანქანების შემოწმებისთვის განკუთვნილი 1.5 მილიონი დოლარის ღირებულების სკანერი გადაეცა.

აღნიშნული სკანერის შეძენა-გადაცემის პროექტი ევროკავშირისა და გაერო-ს განვითარების პროგრამის (UNDP) ინიციატივის ფარგლებში განხორციელდა, რომლის მიზანი სამხრეთ კავკასიაში, საზღვრის ერთიანი მართვის პრინციპების დანერგვაa.

გამშვებ პუნქტ ”სადახლოზე” სკანერის გადმოცემასთან დაკავშირებით გამართულ ღონისძებას ფინანსთა მინისტრის პირველი მოადგილე, შემოსავლების სამსახურის უფროსი გიორგი თაბუაშვილი, საქართველოში ევროკავშირის წარმომადგენლობის ხელმძღვანელი იანოშ ჰერმანი, გაერო-ს განვითარების პროგრამის მოქმედი ხელმძღვანელი საქართველოში შომბი შარპი და სხვა მოწვეული სტუმრები დაესწრნენ.

გიორგი თაბუაშვილმა ცერემონიის მონაწილეებს სიტყვით მიმართა და საქართველოს საბაჟო სისტემაში საზღვრის მართვის ევროპული სტანდარტების დანერგვაში ევროკავშირისა და გაერო-ს განვითარების პროგრამის წვლილის შესახებ ისაუბრა.

”დღეს ”სადახლოზე” ე.წ. სარენდგენო სკანერი დამონტაჟდა, რომელიც სატვრითო ავტომობილების სკანირებისთვის გამოიყენება და საბაჟო სამსახურის ეფექტურობის გაზრდას უზრუნველყოფს. იქედან გამომდინარე, რომ ხდება ძალიან მოკლე დროში და დიდი საიმედოობით სატრანსპორტო საშუალებების სკანირება და სახელმწიფოს ეკონომიკური საზღვრების დაცვა”, - განაცხადა თაბუაშვილმა და დასძინა, რომ საბაჟო-გამშვები პუნქტების აღჭურვა თანამედროვე ტექნოლოგიებით მომავალშიც გაგრძელდება.

 როგორც ევროკავშირის ელჩმა საქართველოში იანოშ ჰერმანმა აღნიშნა, საქართველომ მნიშვნელოვანი ნაბიჯები გადადგა საზღვრის მართვის რეფორმების განხორციელების გზაზე.

”ევროკავშირმა სრულიად აღიარა ეს წარმატება მაშინ, როდესაც დადებითად შეაფასა საქართველოს მიერ ევროკავშირთან სავიზო რეჟიმის ლიბერალიზაციის სამოქმედო გეგმის შესრულება და მიიღო გადაწყვეტილება საქართველოს მოქალაქეთა ევროკავშირთან უვიზო მიმოსვლის შესახებ. ჩვენი მხარდაჭერის მიზანია, ხელი შევუწყოთ მიმდინარე რეფორმას, მათ შორის, ისეთ სპეციფიკურ საკითხებში, როგორიცაა საზღვრის მონიტორინგი”, - განაცხადა ჰერმანმა.

როგორც შომბი შარპმა განაცხადა, საზღვრის მართვა არა მარტო სახელმწიფოს უსაფრთხოების, არამედ ეკონომიკური განვითარების საგანია.

”ღია და ამავდროულად დაცული საზღვარი ხელს შეუწყობს ვაჭრობისა და ადმიანების მიმოსვლას, ეკონომიკურ ზრდას და რეგიონული თანამშრომლობის გაღრმავებას”, - განაცხადა შომბი შარპმა.

 ცერემონიის შემდეგ სტუმრები შემოსავლების სამსახურის თანამშრომლებს შეხვდნენ და ახალი სკანერის მუშაობის სპეციფიკას ადგილზე გაეცნენ. მათ ასევე დაათვალიერეს ყველა ის მოწყობილობა, რომელიც საბაჟო გამშვებ პუნქტს აღნიშნული პროექტის ფარგლებში გადმოეცა. მათ საშუალება მიეცათ თვალყური ედევნებინათ საბაჟო დეპარტამენტის სპეციალურად გაწვრთნილი სამსახურებრივი ძაღლების მიერ საეჭვო ნივთების აღმოჩენის პროცედურისთვისაც.