ევროპის ულტრამემარჯვენე პარტიები ევროკავშირის წევრობის შესახებ რეფერენდუმის ჩატარებას ითხოვენ

ევროპის ულტრამემარჯვენე პარტიები, დიდი ბრიტანეთის მსგავსად, ევროკავშირის წევრობის შესახებ რეფერენდუმის ჩატარებას ითხოვენ.

საფრანგეთის “ნაციონალური ფრონტის” ლიდერმა მარინ ლე პენმა განაცხადა, რომ ბრიტანელებმა სწორი არჩევანი გააკეთეს.

“თავისუფლების გამარჯვებაა. დადგა დრო მსგავსი რეფრენდუმი საფრანგეთსა და ევროკავშირის სხა ქვეყნებში ჩატარდეს, რასაც მე მრავალი წლის განმავლობაში ვითხოვდი”, - წერს მარინ ლე პენი სოციალურ ქსელ “ტვიტერში”. როგორც ცნობილია, საფრანგეთის “ნაციონალური ფრონტის” ლიდერი ვრცელ განცხადებას მოგვიანებით გააკეთებს.

დიდ ბრიტანეთს რეფერენდუმის შედეგებს ულოცავს ნიდერლანდების ულტრამემარჯვენეების ლიდერი გირტ ვაილდერსი. ის ნიდერლანდების ხელისუფლებას ევროკავშირის წევრობის შესახებ რეფრენდუმის დანიშვნისკენ მოუწოდებს.

“ჩვენ გვსურს თავად განვსაზღვროთ ჩვენი ქვეყნის, ჩვენი საკუთარი ფულის, ჩვენი საკუთარი საზღვრების ბედი და საიმიგრაციო პოლიტიკა”, - განაცხადა გირტ ვაილდერსმა.

გერმანიაში ბუნდესტაგის დეპუტატი, მემარჯვენე პოპულისტური პარტიის “ალტერნატივა გერმანიისთვის” წევრი ბეატრიქს ვონ სტორხი დიდი ბრიტანეთის რეფერენდუმის შედეგებს მიესალმება.

“23 ივნისი ისტორიული დღეა. ეს არის დიდი ბრიტანეთის დამოუკიდებლობის დღე. ხალხს ჰკითხეს და ხალხმა გადაწყვიტა. ევროკავშირი როგორც პოლიტიკური გაერთიანება დამარცხდა”,-  ამბობს ბეატრიქს ვონ სტორხი.