ბათუმში, ე.წ. ჭაობის უბანში მიწისქვეშა საკანალიზაციო კომუნიკაციების სარეაბილიტაციო სამუშაოები მიმდინარეობს. ბათუმის მერიის ინფორმაციით, სარეაბილიტაციო სამუშაოები ბათუმის კომუნალური ინფრასტრუქტურის რეაბილიტაციის პროექტის ფარგლებში, წყალარინების A და B კოლექტორების ფარგლებში ხორციელდება.

აღნიშნული სამუშაოები მოიცავს ჭაობის ტერიტორიაზე წყალარინების თვითდენითი და საწნევო კოლექტორებისა და სამომხმარებლო ქსელის სრულ რეაბილიტაციას. კერძოდ, ჯავახიშვილი-ჭავჭავაძე-წერეთელი-ჯორჯიაშვილი-გოგებაშვილი-შავშეთი-მთისძირის ქუჩებს შორის არსებულ დასახლებას.
სამუშაოები, რომლებსაც ტენდერში გამარჯვებული შპს ,,ჯივი ფაიფერი-გზა“ ასრულებს, 2015 წლის მარტში დაიწყო და 2017 წლის მაისში დასრულდება.პროექტის ღირებულება კი 16 მლნ 399 ათას 965 ევროა. პროექტში დასაქმებულია 250 ადამიანი.
კონკრეტულ მონაკვეთებზე სამუშაოების დასრულებისთანავე დაიწყება სანიაღვრე სისტემისა და გზისა და ტროტუარების კეთილმოწყობა. აღნიშნულ სამუშაოებზე ტენდერი მიმდინარე კვირაში გამოცხადდება.