საქართველოს პრეზიდენტის ადმინისტრაციის პრესსპიკერის ეკა მიშველაძის განცხადებით, გიორგი მარგველაშვილი პარლამენტის თავმჯდომარესთან ირაკლი კობახიძესთან დებატებზე თანახმა იყო, თუმცა "მათივე შემოთავაზებაზე მივიღეთ უარი". ამის შესახებ მიშველაძემ პრესკონფერენციაზე თქვა.

"პრეზიდენტი დათანხმდა პარლამენტის თამჯდომარის მიერ შემოთავაზებულ წინადადებას, რომ საზოგადოების წინაშე, მათ შორის, პოლიტიკური პარტიების, სამოქალაქო საზოგადოების, არასამთავრობო სექტორის წინაშე მომხდარიყო საკონსტიტუციო თემების განხილვა. პრეზიდენტი დათანხმდა ამ წინადადებას, რაც გაშუქდებოდა ყველა ტელევიზიის მიერ. გაუგებარი მიზეზით მათსავე შემოთავაზებაზე მივიღეთ უარი", - განაცხადა ეკა მიშველძემ.

საქართველოს პარლამენტის თავმჯდომარემ პრეზიდენტს, კონსტიტუციური კანონის პროექტის შესახებ პირდაპირ ეთერში, ერთად მსჯელობა შესთავაზა. „ჩვენ შეგვიძლია, პრეზიდენტთან ერთად, დებატებზე აქ არ არის საუბარი, დავსხდეთ ჟურნალისტების წინაშე,მედიაში, საზოგადოების წინაშე და არსებული დოკუმენტი ავუხსნათ. პირობა შემიძლია, მოგცეთ, რომ ასეთი ერთობლივი განხილვის პირობებში, ყველა ჟურნალისტი, საზოგადოება დარწმუნდება, რომ ეს დოკუმენტი რეალურად არის სამართლებრივად აბსოლუტურად გამართული და აყალიბებს ძალიან დახვეწილ საპარლამენტო მმართველობის სისტემას“,- განაცხადა  ირაკლი კობახიძემ  „იმედთან“ საუბრისას.

18 ივნისს, საზოგადოებრივმა მაუწყებელმა კონსტიტუციაზე დებატისთვის პრეზიდენტსა და პარლამენტის თავმჯდომარეს ეთერი შესთავაზა. 

პრეზიდენტის ადმინისტრაციის უფროსმა გიორგი აბაშიშვილმა განაცხადა,  რომ პრეზიდენტი პარლამენტის თავმჯდომარეს საკონსტიტუციო ცვლილებების განხილვის ალტერნატიული ფორმატი შესთავაზა.