დღეს, 13:00 საათზე პარლამენტში რიგგარეშე სხდომა გაიმართება. როგორც პარლამენტის თავმჯდომარემ, ირაკლი კობახიძემ განაცხადა, პარლამენტი უფლებამოსილია, რიგგარეშე სხდომა პრეზიდენტის თანხმობის გარეშეც ჩაატაროს.

„რიგგარეშე სხდომის დღის წესრიგში ორი საკითხია წარმოდგენილი - საქართველოს იუსტიციის უმაღლესი საბჭოს წევრების არჩევის საკითხი, საქართველოს კონსტიტუციური კანონის პროექტი საქართველოს კონსტიტუციაში ცვლილების შეტანის თაობაზე, პირველი და მეორე მოსმენით და კონსტიტუციური კანონპროექტის აჭარის ავტონომიური რესპუბლიკის შესახებ, პირველი და მეორე მოსმენით“, - განაცხადა ირაკლი კობახიძემ.

აღსანიშნავია, რომ რიგგარეშე სხდომებს ბოიკოტს უცხადებს „პატრიოტთა ალიანსი“.

„ჩვენ არ მივიღებთ მონაწილეობას ამ ტყუილსა და ფარსში, ვუცხადებთ ბოიკოტს რიგგარეშე სხდომებს. მე მოვუწოდებ ყველა პატიოსან დეპუტატს, ჩვენ ფიცი გვაქვს დადებული პარლამენტის წევრებს და შევასრულოთ ეს ფიცი, ნუ ვუღალატებთ ჩვენს სინდისს და არ დავუჭიროთ მხარი ამ ცვლილებებს, რაც ქვეყანაში გამორიცხავს პრაქტიკულად რევოლუციის გარდა სხვა გზით ხელისუფლების შეცვლას. არჩევნებს აზრი ეკარგება“, - განაცხადა „პატრიოტთა ალიანსის“ ლიდერმა, ვიცე-სპიკერმა ირმა ინაშვილმა.

შეგახსენებთ, რომ პარლამენტმა რიგგარეშე სხდომის მოწვევის თაობაზე პრეზიდენტ გიორგი მარგველაშვილს მიმართა, რაზეც პრეზიდენტმა უარი განაცხადა.