საქართველოს პრემიერ-მინისტრმა, გიორგი კვირიკაშვილმა, მთავრობის სხდომის დაწყების წინ, ენერგეტიკის მინისტრ კახი კალაძეს დედაქალაქის მერის არჩევნებში წარმატება უსურვა.

ამასთანავე, პრემიერმა აღნიშნა, რომ კალაძისთვის  მინისტრის რანგში ბოლო სხდომაა და მას გაწეული სამსახურისთვის მადლობა გადაუხადა.

„დღეს კახისთვის არის ამ ამპლუაში მთავრობის ბოლო სხდომა და მინდა გადავუხადო დიდი მადლობა. კახის მინისტრობის პერიოდში განხორციელდა ძალიან ბევრი მნიშვნელოვანი პროექტი. უხეში დათვლით, ეს არის მილიარდ 200 მილიონი დოლარის პირდაპირი უცხოური ინვესტიცია. 18 ჰიდრო, ორი თბო და ერთი ქარის ელექტროსადგური აშენდა. ჩაყრილია საფუძველი მზის პირველი ელექტროსადგურის მშენებლობაზე და დარწმუნებული ვარ, რომ ახალ, მნიშვნელოვან გამოწვევას, რასაც ჩვენი დედაქალაქის მერობა ჰქვია კახი გაართმევს თავს. პირველ რიგში მოიგებს იმიტომ, რომ აბსოლუტურად პატიოსან ბრძოლაში კახის კონკურენტი ნამდვილად არ ჰყავს და რა თქმა უნდა, ძალიან ბევრს გააკეთებს ჩვენი დედაქალაქისთვის. მინდა წარმატებები ვუსურვო ახალი სიმაღლეების ასაღებად“, - განაცხადა გიორგი კვირიკაშვილმა.