მერობის კანდიდატებმა არა ,,ხრუშოვკებზე", არამედ ავარიულ შენობებზე უნდა ისაუბრონ, - ასე გამოეხმაურა თბილისის ყოფილი მერი გიგი უგულავა ,,ქართული ოცნების" თბილისის მერობის კანდიდატის კახა კალაძის ინიციატივას, „ხრუშჩოვკების“ ეტაპობრივად ჩანაცვლების შესახებ.

როგორც ,,ევროპული საქართველოს" ერთ-ერთი ლიდერი Facebook-ის პირად გვერდზე წერს, იგივეს "ოცნების" პორტირებული ფალავანი ირაკლი შიხიაშვილიც ამბობდა რამდენიმე წლის წინ. მისივე თქმით, მან "არაბებთან" მემორანდუმიც კი გააფორმა. 

,,ისმის შეკითხვა რა განსხვავებაა კალასა და შიხას შორის? - პასუხი არანაირი. 

1. არა ყველა "ხრუშოვკაა" ავარიული. შესაბამისად ყველას ერთ ქვაბში ჩაყრა ძალიან სახიფათო პოპულიზმია. მაგლითად, ვაჟა- ფშაველას ან დიღმის "ხრუშოვკებში" - ეს მოსახლეობის ნერვიულობას გამოიწვევს. ხოლო, მოსკოვის გამზირზე მორიგ იმედგაცრუებას. მერობის კანდიდატებმა არა "ხრუშოვკებზე", არამედ ავარიულ შენობებზე უნდა ისაუბრონ. (შესაბამისი სია მერიაში არსებობს). ძეგლი სხვაა, ხრუშოვკა სხვაა და 80-იანებში აშენებული 16 სართულიანი ვარკეთილის ავარიული კორპუსები კიდევ სხვა. 
2) აუცილებელია "ძველი თბილისის ახალი სიცოცხლის" მსგავსი პარტნიორობის მოდელი, რომელიც არა ტერიტორიულ ერთეულ "ძველ თბილისზე", არამედ მიზნობრივად ავარიულ შენობებზე იქნება ფოკუსირებული (შენობების სტატუსის გათვალისწინებით დიფერენცირებული).
3) ეს ყველაფერი შესაძლებელია მაღალი ეკონომიკური ზრდის პირობებში, რაც "ოცნების" მთავრობამ ვერ უზრუნველყო. ანტისამშენებლო ისტერია, რომლსაც "ოცნებაც" აღვივებს - მშენებლობებმა დაგვანგრიეს- ამ პროექტს მხოლოდ ძირს უთხრის.