საკონსტიტუციო ცვლილებების პროექტის მესამე მოსმენით მიღება 26 სექტემბერს იგეგმება, - ამის შესახებ საპროცედურო საკითხთა და წესების კომიტეტის თავმჯდომარემ გიორგი კახიანმა ჟურნალისტებთან განაცხადა. მანამდე “ქართული ოცნების” წარმომადგენლები ვენეციის კომისიის დასკვნას ელოდებიან, რომელიც არსებული ინფორმაციით, 22 სექტემბრისთვის გახდება ცნობილი.

“ჩვენ სიღრმისეულად, დიდი ინტერესით გავეცნობით ვენეციის კომისის დასკვნას. პირადად მე არ მაქვს მოლოდინი იმის, რომ დასკვნაში რაიმე სახის სამართლებრივი შენიშვნები იქნება. ჩვენ ვენეციის კომისიის ყველა შენიშვნა გავითვალისწინეთ”, - განაცხადა გიორგი კახიანმა.

მომავალი კვირა არასასესიო კვირაა, შესაბამისად, საჭირო იქნება რიგგარეშე სხდომის მოწვევა, რომელსაც პრეზიდენტი ნიშნავს. იმ შემთხვევაში, თუკი გიორგი მარგველაშვილი რიგგარეშე სხდომას არ დანიშნავს, პარლამენტს აქვს უფლებამოსილება 48 საათში შეიკრიბოს და სხდომა ჩაატაროს.