"ეს დღე ძვირად დაგიჯდებათ, რადგან როგორც ჩანს გგონიათ, რომ როგორც ამ დარბაზში ხართ უმრავლესობაში, ასევე ხართ დარბაზს გარეთაც, რაშიც ცდებით" - ასე მიმართა საპარლამენტო უმრავლესობას ერთიანი ნაციონალური მოძრაობის წარმომადგენელმა ნიკა მელიამ.

"გულწრფელად გეტყვით, რომ არ მშურს არც ერთი თქვენგანის, რადგან ვხედავ თქვენს უახლოეს მომავალს - როგორ ეცდებით მომდევნო ხელისუფლებასთან მიკედლებას, რადგან დღეს რეალურად თქვენ ამ პროცესით სათავე დაუდეთ ძალიან მტკივენულ პროცესს, რომელიც ბუმერანგივით მოგიტრიალდებათ. თქვენ ამ პროცესში მარტო ხართ. და რაც არ უნდა ილაპრაკოს ეკა ბესელიამ აქ არ არის ჩემი ტანი და თავიო, დიახ არის.

ამ კონსტიტუციის მიღებაში თქვენ არც ერთი პოლიტიკური და საზოგადოებრივი ჯგუფი არ გყავთ მოკავშირედ. თქვენ აკანონებთ დიქტატორულ და კლანურ კონსტიტუციას. თქვენ მოქალაქეებს ართმევთ უფლებას გადაირჩიონ ხელისუფლება. არ არსებობს კონსტიტუციის გარშემო ელემენტარული თანხმობა”, - განაცხადა ნიკა მელიამ პარლამენტის რიგგარეშე სხდომაზე.