ჩვენს ქალაქში კეთდება უპრეცედენტოდ დიდი სარეკრეაციო ზონა, ეს გადაწყვეტილება ჩვენი მოქალაქეებისთვის მნიშვნელოვანია, - ამის შესახებ საკრებულოს თავმჯდომარის მოადგილემ გიორგი ტყემალაძემ განაცხადა. 

მისი თქმით, დღევანდელ საკრებულოს სხდომაზე საზოგადოებისთვის მნიშვნელოვანი გადაწყვეტილება იქნა მიღებული. 

"თბილისის ჩვენს ქალაქში კეთდება და აშენდება უპრეცედენტოდ დიდი სარეკრეაციო ზონა, ეს გადაწყვეტილება ჩვენი მოქალაქეებისთვის მნიშვნელოვანია, ამ გადაწყვეტილებას ეწინააღმდეგებოდა მარტივ მამრავლებლად დაშლილი "ნაციონალური მოძრაობა", რომელთაც არ აქვთ საზოგადოების მანდატი და მხარდაჭერა. მიგვაჩნია, რომ აღნიშნული გადაწყვეტილებით, ჩვენ ხელი შევუწყობთ იმას, რომ ტერიტორია, ჩვენი ქალაქისთვის უმნიშვნელოვანესი სარეკრეაციო ზონა იყოს", - განაცხადა გიორგი ტყემალაძემ. 

საკრებულოს თავმჯდომარის მოადგილე გამოეხმაურა პუშკინის ქუჩის მიმდებარე ტერიტორიაზე მიწისქვეშა ავტოსადგომის მშენებლობის საკითხს და აღნიშნა, რომ დღევანდელი გადაწყვეტილებით, თბილისის ექნება დამატებითი საპარკინგე სივრცე. 

"ჩვენთვის ყველასთვის ცნობილია, რომ ჩვენი პრიორიტეტია თბილისში შეიქმნას დამატებითი საპარკინგე სივრცეები და ზუსტად ეს გადაწყვეტილება იქნა მიღებული, რათა ამ კომპანიამ მომავალში უკვე განახორციელოს მიწისქვეშა ავტოსადგომის მოწყობა. მიუხედავად ჩვენი კონკრეტული გადაწყვეტილებებისა, რომელიც ჩვენ ქალაქზე და ჩვენ მოსახლეობაზე არის ორიენტირებული იყო მცდელობა გარკვეულად დებოშის მოწყობის და მათ სცადეს აღნიშნული სხდომის ჩაშლა", - განაცხადა ტყემალაძემ. 

მისივე თქმით, საკრებულოს რეგლამენტის დასაცავად კანონით დადგენილი ზომები იქნა მიღებული. 

"საკრებულოს სხდომის ჩაშლის უფლება ნამდვილად არ ჰქონდა არც ერთ ჩვენს ოპოზიციონერ კოლეგას. სამწუხაროა ის, რომ კონკრეტულად ჩვენი მოსახლეობის მიმართ გადადგმულ ნაბიჯებზე და განსახორციელებელ პროექტებზე, რომელიც აწუხებს თითოეულ ჩვენგანს. ამ საკითხების გადაწყვეტილება იყო პოლიტიკურ დღის წესრიგში გადაყვანილი და მათი მხრიდან წინასაარჩევნო კამპანიის გამოყენების მცდელობა, შესაბამისად ჩვენ მივიღეთ პრინციპული გადაწყვეტილება და ჩვენ მივიღეთ გადაწყვეტილება, რომლის შესაბამისადაც თბილისელებს ექნებათ უმნიშვნელოვანესი სარეკრეაციო სივრცე და მიწისქვეშა ავტოსაგდომი", - განაცხადა გიორგი ტყემალაძემ. 

საკრებულოს სხდომაზე კენჭისყრას წინ უძღოდა ხმაური და დაპირისპირება. ვითარება საკრებულოში მას შემდეგ დაიძაბა, რაც „ნაციონალური მოძრაობისა“ და „ევროპული საქართველოს“ წევრები საკრებულოს სხდომის გადადება მოითხოვეს.