ამერიკის ლუიზიანას შტატში 15 წლის მოზარდმა სატვირთო ავტომობილი გაიტაცა, ავზიდან ბენზინი ამოიღო და წმინდა პავლეს სახელობის ბაპტისტურ ეკლესიას ცეცხლი წაუკიდა. ამის შესახებ The Independent-ი წერს.

ინციდენტი ქალაქ რიჩლანდში მოხდა. გავრცელებული ინფორმაციით, ცეცხლი ძირითად შენობას არ მოსდებია, დაიწვა რამდენიმე თვის წინ აშენებული ახალი ნაგებობა.  

ავტომანქანის მფლობელმა კომპანიამ ავტომობილის გადადგილების დადგენა შეძლო.

შედეგად ავტომანქანა მეზობელ კოლდუელის ოლქში დააკავეს.

მოგვიანებით გავრცელდა ინფორმაცია, რომ მოზარდმა ამავე კომპანიის სატვირთო ავტომობილი ადრეც გაიტაცა. მოზარდი დაკავებულია.

მომხდარის მოტივები უცნობია. გამოცემა აზუსტებს, რომ 15 წლის მოსწავლე თეთრკანიანია, ეკლესიის მრევლი კი აფროამერიკელები არიან.