ასობით აქტივისტი, რომლებიც მხარს კატალონიის დამოუკიდებლობას უჭერენ, რეგიონის რამდენიმე მსხვილი ავტომაგისტრალი და სარკინიგზო ხაზი გადაკეტეს. მომიტინგეები ესპანეთის ხელისუფლების მიერ ავტონომიის ლიდერების დაპატიმრებას აპროტესტებენ.  

როგორც ცნობილია, კატალონიის რვა მაღალჩინოსანი გადატრიალების მცდელობისა და ამბოხის წაქეზების გამოძიების ფარგლებში პატიმრობაში რჩება.

საპროტესტო აქციის მონაწილეები გამოვიდნენ ტრანსპარანტებით „თავისუფლება პოლიტპატიმრებს“. ვრცელდება ინფორმაცია პოლიციასთან შეტაკებების შესახებაც, რომელიც ცდილობს მომიტინგეები საავტომობილო გზებიდან გაიყვანოს.

კატალონიის ზოგიერთმა პროფკავშირმა მოუწოდა საყოველთაო გაფიცვისკენ, თუმცა ამ წინადადებას მსხვილმა პროფესიულმა გაერთიანებებმა მხარი არ დაუჭირეს. საპროტესტო აქციებს შეურთდა ზოგიერთი უმაღლესი სასწავლებელი.

არსებული ინფორმაციით, მაღაზიები და დაწესებულებები მუშაობას ჩვეულ რეჟიმში აგრძელებენ. ამასთან სრულად შეწყვეტილია ავტომობილებისა და მატარებლების მოძრაობა საკვანძო მიმართულებებით, მათ შორის ესპანეთისა და საფრანგეთის დამაკავშირებელი მაგისტრალებიც.