იემენში მედიკამენტებისა და საწვავის მარაგი შესაძლოს ერთი თვის განმავლობაში ამოიწუროს, თუ საუდის არაბეთის ხელმძღვანელობით საერთაშორისო კოალიცია იემენის ბლოკადას არ მოხსნის. ამის შესახებ ქვეყანაში ოუნისეფის წარმომადგენელმა განაცხადა.
მისი თქმით, თუ ჰუმანიტარული დახმარება ხოდეიდის პორტში და სანას აეროპორტში არ ჩავა, ქვეყანაში საწვავის მარაგი ნოემბრის ბოლოსთვის ამოიწურება, მედიკამენტების კი - ერთი თვის შემდეგ.

ასევე ჯანდაცვის მსოფლიო ორგანიზაციის განცხადებით, იემენის ბლოკადამ შესაძლოა გამოიწვიოს ქოლერის დაავადების ზრდაც.

ორგანიზაციის მონაცემებით, 27 აპრილიდან 5 ნოემბრამდე ქვეყანაში ქოლერის 900 ათასზე მეტი საეჭვო  შემთხვევა დაფიქსირდა. 2192 შემთხვევა კი გარდაცვალებით დასრულდა.

არაბულმა კოალიციამ ერ-რიადის წინააღმდეგ სარაკეტო დარტყმის შემდეგ სახმელეთო, საჰაერო და საზღვაო პორტები დახურა.

კოალიციის ხელმძღვანელების განცხადებით, მოქმედ სასაზღვრო კონტროლს არ შეეძლო ჰუსიტებისთვის ბალისტიკური რაკეტების მიწოდების გაკონტროლება.

4 ნოემბერს იემენელმა ამბოხებულებმა საუდის არაბეთის წინააღმდეგ რაკეტა გაუშვეს.

საუდის არაბეთის სამხედრო საჰაერო ძალებმა რაკეტა ჩამოაგდეს. ნამსხვრევები დედაქალაქის აეროპორტში ჩამოვარდა. ინციდენტს მსხვერპლი და ნგრევა არ მოჰყოლია.