ნიუ-იორკის ტერაქტის შემსრულებელმა აკაიედ ულამ აფეთქების ადგილი გასულ წელს ბერლინის საშობაო ბაზრობაზე მომხდარი ტერაქტის შთაგონებით შეარჩია. ამის შესახებ New York Times-ი სამართლადმაცველებზე დაყრდნობით წერს.

გამოცემის ცნობით, აკაიედ ულამ გამოძიებას განუცხადა, რომ ბომბი აშშ-ის მიერ სირიაში „ისლამური სახელმწიფოს“ პოზიციების დაბომბის გამო ააფეთქა.

ნიუ-იორკში მანჰეტენზე მიწისქვეშა გადასასვლელში აფეთქება გუშინ მოხდა. წინასწარი მონაცემებით, აკაიედ ულამ მოქმედებაში მოიყვანა სხეულზე დამაგრებული დაბალი ხარისხის ასაფეთქებელი მოწყობილობა.

აფეთქების შედეგად ტერორისტი დაიჭრა, ახლოს მყოფმა  კიდევ სამმა ადამიანმა  სხეულის მსუბუქი დაზიანებები მიიღო.

2016 წლის დეკემბერში ბერლინის ცენტრში სატვირთო ავტომობილი საშობაო ბაზრობაზე შეიჭრა. დაიღუპა 12 და დაშავდა 48 ადამიანი.

24 წლის თავდამსხმელი ტუნისელი ანის ამრი მილანში პოლიციასთან ორმხრივი სროლის შედეგად მოკლეს. ის „ისლამურ სახელმწიფოსთან“ იყო კავშირში.