ინგლისელმა ქირურგმა საიმონ ბრემჰოლმა სასამართლოს წინაშე აღიარა, რომ ორი პაციენტის შინაგან ორგანოებზე თავისი ინიციალები დატოვა. ამის შესახებ The Telegraph-ი იტყობინება.

საუბარია ღვიძლის გადანერგვის ოპერაციებზე, რომლებიც ექიმმა 2013 წლის თებერვალსა და აგვისტოში ჩაატარა. ლაზერის სხივის დახმარებით მან ორგანოებზე ასოები SB დაიტანა.

ბრემჰოლმა დანაშაული „თავდასხმის“ მუხლით აღიარა და არა სხეულის დაზიანების მუხლით.

ქირურგები ლაზერის სხივს იმისთვის იყენებენ, რომ ღვიძლის სისხლდენა შეაჩერონ, ასევე ოპერაციის უბნის მოსანიშნად. ჩვეულებრივად კვალი გარკვეული პერიოდის შემდეგ ქრება.

თუმცა ერთ-ერთ პაციენტს კვალი დარჩა, რაც განმეორებითი ოპერაციის დროს აღმოაჩინეს. ოპერაციას სხვა ექიმი უკეთებდა.

პროკურორის თქმით, ეს მეტად უჩვეულო და რთული საქმეა, რომელსაც ანალოგი სისხლის სამართლაში არ გააჩნია.

ბრემჰოლი ბირმინგემის საავადმყოფოში 12 წელი მუშაობდა. 2014 წელს, მას შემდეგ რაც მის წინააღმდეგ დისციპლინარული გამოძიება დაიწყო, სამსახური დატოვა. ამასთან ქირურგის ერთ-ერთმა პაციენტმა ადგილობრივ მედიას განუცხადა, რომ ექიმმა ის სიკვდილს გადაარჩინა და სამსახურში მისი დაბრუნება მოითხოვა.